Малочныя брэнды

Беларусь – адзін з буйнейшых сусветных экспарцёраў малочных прадуктаў, і кожны дзень брэнды з усіх рэгіёнаў краіны адпраўляюцца ў дзясяткі дзяржаў.

Малочныя холдынгі і заводы Беларусі вырабляюць вялікі асартымент: малако розных відаў, сметанковае масла, смятану, кефір і іншыя знакамітыя кісламалочныя напіткі, тварог, ёгурты і дэсерты, марожанае, сыры – ад традыцыйных сартоў да элітных і эксклюзіўных. У спісе легендарных брэндаў і беларуская згушчонка з Рагачова і Глыбокага.

Вядома, вытворчасць малочных прадуктаў звязана са строгім санітарна-гігіенічным кантролем, асаблівым тэмпературным рэжымам, аднак малочныя кампаніі Беларусі актыўна падключаюцца да ідэі прамысловага турызму. Сярод іх і знакамітыя брэнды "Бабуліна крынка", "Савушкін прадукт… Як правіла, экскурсіі праводзяцца ў групах пасля папярэдняга ўзгаднення, таму зручней наведваць заводы з дапамогай тураператараў.

Больш даступны прадпрыемствы, дзе ўжо ў працэсе будаўніцтва або рэканструкцыі спраектаваны доўгія шкляныя галерэі для турыстаў, адкуль адкрываецца добры від на вытворчасць.

Тураўскі малочны камбінат

Паспяховы сучасны брэнд створаны ў старажытным горадзе Тураве на Прыпяцкім Палессі: тут з беларускага малака вырабляюць мяккія і паўцвёрдыя сыры па італьянскіх тэхналогіях. Турыстаў чакае экскурсія па заводзе, дэгустацыя сыроў і абед у фірменным кафэ.

Адрас: Гомельская вобласць, Жыткавіцкі раён, г. Тураў, вул. Ленінская, 154

ААТ "Малочны Свет" у Гродне

Гасцям гэтага прадпрыемства прапануецца экскурсія па вытворчасці сычужных сыроў, дзе з вышыннай галерэі можна ўбачыць увесь працэс прыгатавання ад малака да выспелага сыру, задаць пытанні і, вядома, ацаніць смак на дэгустацыі. Для турыстаў дзейнічае сістэма папярэдняга запісу.

Адрас: г. Гродна, вул. Гаспадарчая, 28

Крафтавыя сыры са Слаўгарада

Калі вы любіце сыр, а галоўнае, цэніце не толькі прамысловыя рэцэптуры і тэхналогіі, але і эксклюзіўныя аўтарскія інтэрпрэтацыі, варта зазірнуць у цэнтр беларускага дамашняга сыраварэння – горад Слаўгарад Магілёўскай вобласці.

Мясцовыя фермеры і рамеснікі ўручную гатуюць дзясяткі відаў сыроў на любы густ: цвёрдыя і мяккія, плаўленыя і тварожныя, салодкія, салёныя і вэнджаныя, з травамі, спецыямі і натуральнымі дабаўкамі (кмену, лёну, мёду і яшчэ многіх незвычайных інгрэдыентаў). Сакрэтамі гатавання майстры дзеляцца ў "Сырнай лаўцы", дзе можна пакаштаваць усе аўтарскія сарты і навінкі. А ў красавіку ў Слаўгарадзе праходзіць папулярны гастранамічны фестываль "Гаспадарчы сыр".

версія для друку

зрабіць стартавай

дабавіць у выбранае