Чэмпіянат свету па біятлоне сярод юнакоў і юніёраў-2015 у Беларусі

Чэмпіянат свету сярод юнакоў і юніёраў па біятлоне прайшоў 17–24 лютага 2015 года ў Беларусі.

Галоўнай пляцоўкай спаборніцтваў стала знакамітая спартыўная база – Рэспубліканскі цэнтр алімпійскай падрыхтоўкі па зімовых відах спорту "Раўбічы", дзе знаходзіцца адзін з лепшых у свеце біятлонных комплексаў. Напярэдадні першынства ў цэнтры завяршылася маштабная рэканструкцыя, дзякуючы чаму сёння "Раўбічы" аснашчаны найноўшым абсталяваннем і тэхналогіямі, якія адпавядаюць усім сусветным стандартам.

Чэмпіянат па традыцыі ўключаў два залікі:

• сярод юніёраў і юніёрак (ва ўзросце 19-21 года);
• сярод юнакоў і дзяўчат (маладзейшых за 19 гадоў).

Чэмпіёны і прызёры чэмпіянату свету па біятлоне сярод юнакоў і юніёраў

Індывідуальная гонка, дзяўчаты (10 км) – Ганна Крыванос (Украіна), Інгрыд Ландмарк Тандрэвалд (Нарвегія), Лізавета Капліна (Расія)

Індывідуальная гонка, юнакі (12,5 км) – Кірыл Стральцоў (Расія), Андэрс Эміл Шылеруп (Данія), Ігар Шацько (Расія)

Індывідуальная гонка, юніёркі (12,5 км) – Юлія Журавок (Украіна), Кінга Мітарай (Польшча), Галіна Вішнеўская (Казахстан)

Індывідуальная гонка, юніёры (15 км) – Арыстыд Бегу (Францыя), Аляксандр Дзядзюхін (Расія), Вемунд Гурыгард (Нарвегія)

Спрынт, дзяўчаты (6 км) – Дар'я Блашко (Беларусь), Джулія Швайгер (Аўстрыя), Інгрыд Ландмарк Тандрэвалд (Нарвегія)

Спрынт, юнакі (7,5 км)  – Ёнас Углем Мабакен (Нарвегія), Фелікс Ляйтнер (Аўстрыя), Матыс Хауг (Нарвегія)

Спрынт, юніёркі (7,5 км) – Лена Арно (Францыя), Галіна Вішнеўская (Казахстан), Хлой Шэвалье (Францыя)

Спрынт, юніёры (10 км) – Аляксандр Дзядзюхін (Расія), Фаб'ен Клод (Францыя), Шон Доэрці (ЗША)

Гонка праследавання, дзяўчаты (7,5 км) – Інгрыд Ландмарк Тандрэвалд (Нарвегія), Джулія Швайгер (Аўстрыя), Сімона Купфнер (Аўстрыя)

Гонка праследавання, юнакі (10 км)– Фелікс Ляйтнер (Аўстрыя), Кірыл Стральцоў (Расія), Матыяс Хауг (Нарвегія)

Гонка праследавання, юніёры (12,5 км) – Эдуард Латыпаў (Расія), Вемунд Гурыгард (Нарвегія), Аляксандр Паварніцын (Расія)

Эстафета, дзяўчаты (3х6 км) – Беларусь, Расія, Нарвегія

Эстафета, юнакі (3х7,5 км) – Расія, Украіна, Нарвегія

Эстафета, юніёркі (3х6 км) – Францыя, Расія, Германія

Эстафета, юніёры (4х7,5 км) – Расія, Нарвегія, Францыя

Беларусь – месца правядзення ЧС-2015 па біятлоне сярод юнакоў і юніёраў

Сусветнае першынство па біятлоне сярод юніёраў заснавана ў 1967 годзе. З 1989 года праходзяць  спаборніцтвы сярод юніёрак, а з 2002 года – сярод юнакоў і дзяўчат.

У лютым 2013 г. Міжнародны саюз біятланістаў (IBU) прыняў рашэнне аб правядзенні юніёрскага ЧС-2015 менавіта ў Беларусі. Безумоўна, аргументамі на карысць краіны сталі сучасны біятлонны комплекс і поспехі нашых спартсменаў на сусветнай арэне.

Сярод знакамітых беларускіх страляючых лыжнікаў – Сяргей Булыгін, Аляксандр Папоў, Святлана Парамыгіна, Алег Рыжанкоў, Алена Зубрылава, Вадзім Сашурын, Аляксей Айдараў, Уладзімір Драчоў… І, зразумела, зорка сучаснага біятлона – Дар'я Домрачава, якая на працягу многіх сезонаў знаходзіцца сярод лідараў сусветнага рэйтынгу. А свае першыя міжнародныя ўзнагароды спартсменка заваявала менавіта на чэмпіянатах свету сярод юніёраў.

У лютым 2014-га на зімовай Алімпіядзе ў Сочы "беларуская ракета" Даша Домрачава стала трохразовай чэмпіёнкай і першай жанчынай у біятлоне, якая заваявала адразу тры алімпійскія ўзнагароды ў асабістых гонках. Бронзу Сочы-2014 заваявала яшчэ адна беларуская біятланістка Надзея Скардзіна.

Сапраўды, біятлон у Беларусі карыстаецца вялікай папулярнасцю. Больш за 2 тысячы юных спартсменаў займаюцца гэтым відам спорту, і многія беларусы з'яўляюцца паклоннікамі біятлона, балельшчыкамі нацыянальнай зборнай.
 
У Беларусі да чэмпіянату свету па біятлоне-1974 быў пабудаваны знакаміты спартыўны комплекс "Раўбічы",  дзе за дзесяцігоддзі было праведзена мноства міжнародных турніраў топ-узроўню па біятлоне, лыжных гонках і фрыстайле.

У 2015 годзе ў краіне з'явіцца яшчэ адзін біятлонны комплекс са стрэльбішчам – у наваколлі Гарадка Віцебскай вобласці.

"Раўбічы" – галоўная пляцоўка чэмпіянату свету па біятлоне сярод юнакоў і юніёраў

Рэспубліканскі цэнтр алімпійскай падрыхтоўкі па зімовых відах спорту "Раўбічы" адкрыўся ў лютым 1974 года. Узведзены спецыяльна да  чэмпіянату свету па біятлоне, ён ідэальна адпавядаў усім умовам для такіх аб'ектаў. Сярод іх мяккі зімовы клімат з умеранымі ападкамі і спрыяльнай ружай вятроў, перасечаная мясцовасць, неабходная для стварэння трас рознай складанасці, зручнае размяшчэнне недалёка ад Мінска і добрыя  транспартныя зносіны…

У наваколлі вёскі Раўбічы, дзе знаходзіцца спарткомплекс, захаваўся асаблівы ландшафт, які нярэдка параўноўваюць са Швейцарыяй. Пакрытыя хвойнымі лясамі ледніковыя ўзгоркі чаргуюцца з раўніннымі лугамі ля берагоў ракі Усяжы і маляўнічага штучнага возера.

Цэнтр "Раўбічы" прызначаны для трэніровак і спаборніцтваў па зімовых відах спорту: біятлоне, лыжных гонках і лыжным дваябор'і, скачках на лыжах з трампліна, слаламе, канькабежным спорце, фрыстайле, снаўбордзе.

Галоўныя спартыўныя аб'екты комплексу:

• біятлонны стадыён (асноўнае і трэніровачнае стрэльбішчы на 38 мішэней, крыты 50-метровы цір, трыбуны)
• лыжаролерная траса (працягласць 7,5 км, шырыня 6 м)
• скачковыя трампліны
• крыты каток
• спартыўная зала
• судзейскі павільён
• трэнажорныя залы
• ролікадром
• гарналыжны схіл
• тэнісныя корты, пляцоўкі для баскетбола, міні-футбола

На тэрыторыі цэнтра працуюць медыка-аднаўленчы цэнтр, гасцініцы і камандныя катэджы, рэстаран, кафэ і бар-піцэрыя, пункты пракату спартыўнага інвентару…

У беларускіх "Раўбічах" праходзілі буйнейшыя турніры:

• чэмпіянаты свету па біятлоне (1974, 1976, 1982, 1990);
• чэмпіянаты Еўропы па біятлоне (1998, 2004);
• Кубак свету па лыжных гонках (1991);
• этапы Кубка Еўропы па фрыстайле (1995, 2006).

За правядзенне чэмпіянату свету па біятлоне-1982 комплекс адзначаны залатым знакам UIPMB.

У 1996 годзе Міжнародны саюз біятланістаў прысвоіў цэнтру "Раўбічы" катэгорыю А – з ліцэнзіяй на правядзенне спаборніцтваў вышэйшага  ўзроўню без выключэнняў.

Сёння "Раўбічы" – адзін з лепшых зімовых спартыўных комплексаў у свеце. Пасля грандыёзнай рэканструкцыі, якая працягвалася некалькі гадоў, комплекс набыў суперсучасную інфраструктуру і стаў яшчэ больш камфортным для спартсменаў і трэнераў, суддзяў і журналістаў, турыстаў.

Спаборніцтвы юніёрскага ЧС-2015, на які прыедуць больш за 600 удзельнікаў, будзе прымаць абноўлены біятлонны стадыён:

• спаборніцкія трасы даўжынёй 1,5 км, 2 км, 2,5 км, 3 км, 3,3 км, траса для трэніровак даўжынёй да 5 км (якаснае пакрыццё, 4 рэжымы асвятлення – дзяжурны, трэніровачны, спаборніцкі і спаборніцкі з тэлездымкамі);
• стрэльбішча с 30 мішэнямі (Kurvinen);
• сучасныя вакс-кабіны і памяшканні для падрыхтоўкі рыштунку;
• зручныя памяшканні для пераапранання;
• адкрытыя трыбуны для гледачоў на 2,5 тысячы месц (у цэнтры стадыёна будуць працаваць два вялікія электронныя табло);
• судзейскі павільён (цэнтр збору інфармацыі, сакратарыят, каментатарскія пазіцыі, допінг-кантроль, офісы Міжнароднага саюза біятланістаў);
• прэс-цэнтр плошчай звыш 600 м².

Як дабрацца ў Раўбічы?

Цэнтр алімпійскай падрыхтоўкі "Раўбічы" знаходзіцца за 20 кіламетраў ад Мінска – недалёка ад аўтатрасы Мінск – Віцебск (М3).

Адлегласць ад Нацыянальнага аэрапорта "Мінск" да комплексу "Раўбічы" – каля 25 км (аўтадарогі М2, Р80).

Дабрацца з Мінска ў Раўбічы можна на маршрутных аўтобусах (ад ДС "Славінскага" ў напрамках Аколіца, Батурынка), на аўтамабілі (каардынаты – N 54° 03. 718', E 27° 44. 381').

Праграма чэмпіянату свету сярод юнакоў і юніёраў па біятлоне-2015

Праграма чэмпіянату ўключала спаборніцтва юніёраў і юнакоў, юніёрак і дзяўчат па 4 спаборніцкіх дысцыплінах біятлона:

• індывідуальная гонка,
• спрынт,
• гонка праследавання,
• эстафета.

На працягу некалькіх дзён удзельнікі сусветнага першынства разыгралі 16 камплектаў узнагарод.

версія для друку

зрабіць стартавай

дабавіць у выбранае