Бізнес-навіны
Золатавалютныя рэзервы Беларусі да канца 2020 года павінны скласці не менш як $7,3 млрд
5 лістапада, Мінск /Кар. БЕЛТА/. На 1 студзеня 2021 года міжнародныя рэзервовыя актывы Беларусі ў адпаведнасці з метадалогіяй Міжнароднага валютнага фонду павінны складаць не менш як $7,3 млрд. Гэта прадугледжана Асноўнымі напрамкамі грашова-крэдытнай палітыкі на 2020 год (АНГКП), зацверджанымі ўказам Прэзідэнта нумар 402, тэкст якога размешчаны на Нацыянальным прававым інтэрнэт-партале, паведамляе карэспандэнт БЕЛТА.
У мэтах павышэння эканамічнай бяспекі краіны і забеспячэння фінансавай стабільнасці Нацыянальны банк сумесна з урадам прадоўжыць работу па падтрыманні ўзроўню міжнародных рэзервовых актываў і паляпшэнні іх структуры шляхам пагашэння часткі валютных абавязацельстваў за кошт выкарыстання недаўгавых крыніц. Пры гэтым Нацбанк не плануе ажыццяўляць прыцягненне знешніх пазык і крэдытаў.
Аб шырокай грашовай масе
З улікам неабходнасці забеспячэння цэнавай стабільнасці прырост сярэдняй шырокай грашовай масы прагназуецца на ўзроўні 8-11 працэнтаў (снежань 2020 года і снежань 2019-га). Збалансаванаму росту грашовага прапанавання будзе садзейнічаць падтрыманне ў рэальным выражэнні працэнтных ставак у эканоміцы на дадатным узроўні. У якасці аперацыйнага арыенціра манетарнай палітыкі захаваецца працэнтная стаўка па аднадзённых міжбанкаўскіх крэдытах у нацыянальнай валюце, ваганні якой можа пры неабходнасці абмяжоўваць Нацбанк.
Стаўка рэфінансавання, як і раней, будзе адыгрываць ключавую ролю пры рэгуляванні грашовага прапанавання ў эканоміцы.
Што датычыцца наяўнага грашовага абарачэння, то ў 2020 годзе прадоўжыцца пераход на новую сістэму, калі функцыі па інкасацыі, перавозцы, захоўванні наяўных грашовых сродкаў будзе выконваць ААТ "Нябанкаўская крэдытна-фінансавая арганізацыя "Белінкасгруп". Гэта дасць магчымасць скараціць сукупныя расходы Нацыянальнага банка, банкаў па абслугоўванні наяўнага грашовага абарачэння, павысіць эфектыўнасць функцыянавання банкаўскай сістэмы пры захаванні за Нацбанкам функцый цэнтралізаванага кіравання наяўным грашовым абарачэннем.
Аб курсавой палітыцы
Нацыянальны банк прадоўжыць праводзіць курсавую палітыку ў рэжыме плаваючага курса, гэта значыць з выкарыстаннем валютных інтэрвенцый для згладжвання рэзкіх ваганняў курса беларускага рубля. Аднак для зніжэння ступені ўдзелу Нацбанка ў таргах на ўнутраным валютным рынку плануецца скараціць штодзённы ліміт інтэрвенцый, пашырыць межы аперацыйнага інтэрвалу і нейтральнага дыяпазону. Аперацыі па куплі замежнай валюты для папаўнення золатавалютных рэзерваў Нацбанк будзе праводзіць у выпадку ўстойлівага перавышэння яе прапанавання над попытам на ўнутраным валютным рынку.
Аб валютнай лібералізацыі
У 2020 годзе прадоўжыцца правядзенне валютнай лібералізацыі, што стане фактарам паляпшэння інвестыцыйнага клімату ў Беларусі і ўмоў вядзення бізнесу, у тым ліку спрашчэння адміністрацыйных працэдур, а таксама разняволення дзелавой ініцыятывы грамадзян.
Прадугледжваецца фарміраванне новай прававой базы для зняцця абмежаванняў на правядзенне фізічнымі асобамі - рэзідэнтамі валютных аперацый, звязаных з рухам капіталу, а таксама адкрыццё юрыдычнымі асобамі - рэзідэнтамі рахункаў за межамі Беларусі, адмена абмежаванняў тэрмінаў вяртання валютнай выручкі і іх ўстанаўленне ў знешнегандлёвых дагаворах.
Адначасова прадугледжаны мерапрыемствы па павышэнні эфектыўнасці кантролю над захаваннем парадку правядзення валютных аперацый. Плануецца сфарміраваць сістэму валютнага маніторынгу, якая забяспечыць Нацбанк аператыўнай і аб'ектыўнай інфармацыяй аб стане ўнутранага валютнага рынку, а таксама дасць магчымасць ажыццяўляць кантроль за патокамі грашовых сродкаў пры правядзенні валютных аперацый.
Аб банкаўскіх укладах
Урад і Нацбанк прадоўжаць ствараць умовы для захаванасці і прывабнасці ўкладаў (дэпазітаў) на доўгатэрміновай аснове, у першую чаргу ў нацыянальнай валюце. Гэта будзе садзейнічаць павышэнню ўстойлівасці функцыянавання банкаўскай сістэмы, забеспячэнню збалансаванасці актываў і пасіваў, стане адным з фактараў далейшай девалютызацыі эканомікі краіны.
Дзеянні Нацбанка будуць накіраваны на стымуляванне банкаў да нарошчвання імі доўгатэрміновай рэсурснай базы праз прыцягненні грашовых сродкаў фізічных і юрыдычных асоб на працяглы тэрмін і выкарыстання гэтых грашовых сродкаў у якасці эфектыўнай унутранай крыніцы інвестыцыйных рэсурсаў.
Атрымае далейшае развіццё інвестыцыйны банкінг. Чакаецца пашырэнне паслуг банкаў у брокерскай дзейнасці і дзейнасці па даверным кіраванні. Прадугледжана работа па фарміраванні сістэмы прысваення і выкарыстання рэйтынгаў па нацыянальнай шкале.
Аб крэдытаванні
У Беларусі будуць фарміравацца ўмовы для падтрымання тэмпаў крэдытавання, у тым ліку спажывецкага. Напрыклад, плануецца стварыць такія прававыя ўмовы, каб мабільныя аператары маглі прадастаўляць пазыкі фізічным асобам.
Аднак асаблівая ўвага будзе ўдзелена таму, каб узровень крэдытавання не прыводзіў да нарастання сістэмных рызык. Для гэтага плануецца выкарыстоўваць паказчыкі даўгавой нагрузкі, паказчыкі забяспечанасці крэдыту, сістэму мер на аснове разліковай велічыні стандартнай рызыкі. Прадоўжыцца ўдасканаленне падыходаў да ацэнкі крэдытнай рызыкі з улікам міжнародных стандартаў. Значную ўвагу ў 2020 годзе плануецца ўдзяліць рабоце па падтрыманні долі неабслугоўваемых актываў банкаў у актывах, схільных да крэдытнай рызыкі, на бяспечным узроўні, які не перавышае 10 працэнтаў.
Аб спосабах аплаты
У 2020 годзе будуць прапрацаваны альтэрнатыўныя спосабы аплаты тавараў і паслуг з выкарыстаннем інавацыйных зручных сэрвісаў. Гэта дасць магчымасць ажыццяўляць разлікі непасрэдна з рахункаў карыстальнікаў на рахункі арганізацый гандлю (сэрвісу) і знізіць кошт плацежных паслуг.
Прадоўжыцца развіццё сістэм дыстанцыйнага банкаўскага абслугоўвання, укараненне новых бяспечных і даступных лічбавых банкаўскіх тэхналогій для аказання фінансавых паслуг кліентам банкаў і актыўнага выкарыстання новых відаў плацежных інструментаў і сродкаў плацяжу, а таксама прадастаўлення аддаленага доступу да прадуктаў і паслуг у рэжыме 24/7/365.
версія для друку
зрабіць стартавай
дабавіць у выбранае