Прыклады паспяховага бізнесу ў Беларусі

СЗАТ "БелДжы"

Міжнародныя кампаніі, якія паспяхова працуюць у Беларусі: сферы дзейнасці, кропкі росту і дасягненні, сацыяльная адказнасць

Інвестыцыйны клімат і кластары развіцця ў Беларусі

Да гэтага часу ў Беларусі сфарміравалася шырокая сістэма прэферэнцыйных рэжымаў для інвестараў – ад стымулявання высокатэхналагічных і накіраваных на экспарт, а таксама імпартазамяшчэнне вытворчасцей да развіцця рэгіёнаў. Больш за тое, дзеючыя рэжымы ўзаемна дапаўняюць адзін аднаго. Сярод іх:

свабодныя эканамічныя зоны (у Мінску і ўсіх абласных цэнтрах);
індустрыяльны парк "Вялікі камень";
асаблівая эканамічная зона "Брэміна-Орша";
Парк высокіх тэхналогій;
інвестыцыйны дагавор з Рэспублікай Беларусь;
сярэднія, малыя гарадскія паселішчы, сельская мясцовасць;
Аршанскі раён Віцебскай вобласці;
Паўднёва-ўсходні рэгіён Магілёўскай вобласці (ПУР);
рэалізацыя інвестыцыйных праектаў з прымяненнем механізмаў дзяржаўна-прыватнага партнёрства.

Замежныя інвестыцыі ў Беларусь за 2002-2010 гады ўзраслі ў 13 разоў, а аб'ём знешняга гандлю – у 4 разы.

За апошнія дзесяць гадоў – з 2014 па 2023 год – у беларускую эканоміку ўкладзена каля 100 млрд долараў замежных інвестыцый.

У 2023 годзе замежныя інвестары ўклалі ў рэальны сектар эканомікі Беларусі (акрамя банкаў) $7,7 млрд. Сярод асноўных інвестыцыйных партнёраў беларускіх суб'ектаў – кампаніі з Расіі, Кіпра.

На сучасным этапе ў краіне завяршаецца альбо завершана работа па рэалізацыі такіх знакавых праектаў, як БелАЭС, БНБК, завод па выпуску легкавых аўтамабіляў. У сувязі з гэтым будучая інвестпраграма напаўняецца новымі вялікімі бізнес-ініцыятывамі.

Індустрыяльны парк "Вялікі камень" – і як самы маштабны міжнародны праект супрацоўніцтва паміж Беларуссю і Кітаем, што займае адно з ключавых месцаў у ініцыятыве "Адзін пояс, адзін шлях", і як максімальна камфортны прэферэнцыйны рэжым, і як зручная еўрапейская пляцоўка для вядзення бізнесу – з кожным годам набірае абароты. Колькасць новых рэзідэнтаў павялічваецца і ўжо дасягнула 135 (2024). Геаграфія ўдзельнікаў – Кітай, Расія, ЗША, краіны ЕС і іншыя. На пачатковых этапах у Парк заходзілі кампаніі, якія займаліся пераважна лагістыкай і складской дзейнасцю, аднак сёння прыярытэт аддаецца вытворчасці.

Сярод асноўных напрамкаў дзейнасці для рэзідэнтаў Парка: машынабудаванне, электроніка і тэлекамунікацыі, тонкая хімія, біятэхналогіі, новыя матэрыялы, фармацэўтыка, лагістыка, электронная камерцыя і інш. Сёння ў "Вялікім камені" працуюць прадпрыемствы з удзелам кітайскіх карпарацый па выпуску рухавікоў унутранага згарання для пасажырскага і грузавога транспарту, каробак перадач, будаўнічай тэхнікі. Ёсць паспяховыя праекты беларускіх рэзідэнтаў – сумеснае кітайска-беларускае прадпрыемства выпускае беспілотныя і пілатуемыя лятальныя апараты, наладжана вытворчасць шкла для ўсіх відаў наземнага транспарту. Акрамя таго, тут выпускаецца лазернае абсталяванне, шырокі спектр медыцынскай прадукцыі…

Цяпер беларуская эканоміка развіваецца вельмі дынамічна, нягледзячы на абмежаванні, звязаныя з беспрэцэдэнтнымі санкцыямі, уведзенымі з 2022 года ЕС, ЗША і іншымі краінамі ў адносінах да Беларусі.

Экспарт з’яўляецца адным з прыярытэтаў эканамічнага развіцця краіны. Сёння Беларусь пастаўляе на замежныя рынкі 64% прадукцыі, якая вырабляецца.

Важнейшыя экспартныя пазіцыі: прадукцыя нафтахіміі, машынабудавання, металургіі, дрэваапрацоўкі, лёгкай прамысловасці, малочная і мясная прадукцыя, мэбля, шкло, шкловалакно, цэмент.

!!! За апошнія гады Беларусь заваявала статус аднаго з вядучых экспарцёраў прадуктаў харчавання ў свеце. Доля харчовых тавараў і сельскагаспадарчай сыравіны ў агульнай структуры экспарту – больш за 20%.

Беларусь уваходзіць у топ-5 экспарцёраў малака і малакапрадуктаў, топ-15 экспарцёраў мяса і мясапрадуктаў, штогод пастаўляючы якасныя прадукты харчавання больш як у 100 дзяржаў свету.

Некалькі прыкладаў паспяховага бізнесу

Кока-Кола

Вытворчае прадпрыемства "Кока-Кола Беўрыджыз Беларусь" – адна з буйных кампаній краіны, створаных з прыцягненнем замежных інвестыцый.

"Кока-Кола" выйшла на беларускі рынак у 1994 годзе. У ліпені 1997 года кампанія запусціла сучасны вытворчы комплекс па выпуску напіткаў у пасёлку Калядзічы Мінскай вобласці.

З таго часу прысутнасць "Кока-Колы" на рынку Беларусі істотна ўзрасла. Цяпер кампанія мае 7 дыстрыб’ютарскіх цэнтраў (у Мінску і абласных гарадах Беларусі, а таксама Баранавічах і Бабруйску), шэраг прадстаўніцтваў у рэгіёнах, сучасную інфраструктуру рэалізацыі прадукцыі.

Унітарнае прадпрыемства "Кока-Кола Беўрыджыз Беларусь" (Coca-Cola HBC Belarus) уваходзіць у Групу кампаній Coca-Cola HBC, якая з’яўляецца самым вялікім у Еўропе і другім па велічыні ў свеце ботлерам The Coca-Cola Company.

Прадпрыемства "Кока-Кола Беўрыджыз Беларусь" заваявала серыю ўзнагарод, у тым ліку:

Прыз Прэзідэнта Кампаніі Coca-Cola за дасягненні ў галіне якасці і аховы навакольнага асяроддзя (2005)
"Лепшы прадпрымальнік года" ў Беларусі (2006 – лаўрэат, 2011 – пераможца ў сферы вытворчасці прадуктаў харчавання)
"Лепшая прадукцыя года" ў Беларусі – неаднаразова

"Кока-Кола" на рынку Беларусі:

Больш за 70 працэнтаў партнёраў і пастаўшчыкоў кампаніі – беларускія прадпрыемствы.
Дзве трэці матэрыялаў, што выкарыстоўваюцца ў вытворчым працэсе, закупляюцца ў Беларусі.
На кожнага служачага “Кока-колы” ў Беларусі прыпадае больш за дзесяць чалавек, занятых у працэсе пастаўкі сыравіны і прадастаўленні паслуг.

Кампанія вырабляе ў Беларусі напіткі сусветных гандлёвых марак, а таксама лакальныя брэнды – газіраваныя, негазіраваныя і энергетычныя напіткі, пітную ваду, сокі і соказмяшчальныя прадукты.

"Кока-Кола" ў Беларусі актыўна падтрымлівае дабрачынныя праекты і ініцыятывы ў сферы культуры, адукацыі, развіцця моладзі, захавання і абароны навакольнага асяроддзя; супрацоўнічае з Міністэрствам па надзвычайных сітуацыях, Беларускім Таварыствам Чырвонага Крыжа, Міністэрствам прыродных рэсурсаў і аховы навакольнага асяроддзя, РГА "Беларускі дзіцячы фонд"… Важкі ўклад кампанія ўносіць у правядзенне Юрыдычнай алімпіяды сярод студэнтаў, навучальных семінараў і бізнес-трэнінгаў для сацыяльна слабаабароненых катэгорый насельніцтва, напрыклад, жанчын, якія выхоўваюць дзяцей-інвалідаў, сірот, шматдзетных маці. Таксама прадпрыемства аказвае спонсарскую дапамогу дзіцячым дамам, медыцынскім установам і грамадскім арганізацыям.

У спісе вялікіх прыродаахоўных праектаў, якія падтрымала кампанія:

"Выратуем Ельню разам!" – экапраграма па аднаўленні аднаго з буйнейшых верхавых балот кантынентальнай Еўропы – Ельні;
доўгатэрміновы праект па прыбіранні тэрыторыі біялагічнага заказніка "Тураўскі луг": гэта адно з самых вялікіх у Еўропе месцаў гнездавання і міграцыйнага спынення водна-балотных птушак больш як 50 відаў;
рэспубліканская акцыя па пасадцы дрэў "Тыдзень лесу", экаакцыя "Мы клапоцімся" і інш.

МАЗ-МАН

МАЗ-МАН – сумеснае беларуска-германскае прадпрыемства, буйны вытворца вялікагрузных аўтамабіляў еўрапейскага класа для рэгіянальных і міжнародных перавозак, будаўнічай і спецыяльнай тэхнікі, франтальных пагрузчыкаў ВМЕ.

Прадпрыемства заснавана ў снежні 1997 года, і ўжо ў красавіку 1998-га быў сабраны першы аўтамабіль "МАЗ-MAН".

Кампанія "МАЗ-МАН" спалучае:

сучасную тэхналогію германскага партнёра (аўтаканцэрн "МАН" у Мюнхене)
вопыт, прадукцыйнасць і навацыі беларускага аўтагіганта (прадпрыемства "МАЗ" у Мінску)

Сёння "МАЗ-МАН" можа вырабляць да 3000 аўтамабіляў у год. Тут працуе больш за 350 чалавек.

Выпушчаная ў Беларусі тэхніка "МАЗ-MAН" адпавядае ўсім дзеючым і перспектыўным патрабаванням еўрапейскіх правіл і дырэктыў, у тым ліку правілам ЕЭК ААН па нормах ад Euro 3 да Euro 5, якія рэгулююць узровень выхлапу і шуму.

З 2006 года, акрамя вялікагрузных аўтамабіляў, кампанія вырабляе лінейку франтальных пагрузчыкаў для розных галін, у тым ліку сельскагаспадарчых, будаўнічых і камунальных работ, эксплуатацыі ў абмежаванай прасторы складскіх і цяплічных памяшканняў і г.д.

У 2014 годзе зусім новым аб'ектам вытворчасці кампаніі стаў снегабалотаход – транспартны сродак для перамяшчэння ў складаных дарожных умовах (па снежнай цаліне, пяску, балоцістай мясцовасці, тундры) і пераадолення водных перашкод.

Іншыя праекты з замежнымі інвестыцыямі ў Беларусі

Колькасць праектаў з замежнымі інвестыцыямі ў Беларусі павялічваецца.

Сярод паспяховых праектаў таксама:

ААТ "Штадлер Мінск" – сумеснае беларуска-швейцарскае прадпрыемства па вытворчасці электратранспарту для горада і чыгункі (“Белкамунмаш” і Stadler Rail AG);
СЗАТ "БелДжы" – сумеснае беларуска-кітайскае прадпрыемства па вытворчасці легкавых аўтамабіляў;
СЗАТ "Эс-Эн-Эй Еўропа Індастрыз Бісаў" – беларуска-шведска-амерыканскае прадпрыемства па вытворчасці стальных інструментаў;
СТАА "Мабільныя ТэлеСістэмы" – беларуска-расійская тэлекамунікацыйная кампанія;
СП "Санта Брэмар" ТАА – беларуска-германская кампанія. Сёння брэнд BREMOR – адзін з буйнейшых вытворцаў прадуктаў харчавання ў Еўропе. На пачатковых этапах спецыялізацыяй кампаніі была гатовая прадукцыя з рыбы і морапрадуктаў, аднак цяпер у партфелі – больш за 1000 відаў прадуктаў у больш як 10 катэгорыях і пад 15 гадлёвымі маркамі.