Бізнес-навіны

22 чэрвеня, Мінск /Кар. БЕЛТА/. Закладка першага каменя ў будаўніцтва шматфункцыянальнага цэнтра "Мінск-Мір" адбудзецца ў верасні. Аб гэтым паведаміў сёння журналістам дэпутат Народнай Скупшчыны (парламента) Сербіі, ганаровы консул Беларусі ў Бялградзе Драгамір Карыч, перадае карэспандэнт БЕЛТА.

Паводле слоў Драгаміра Карыча, будаўніцтва цэнтра будзе весціся паралельна з праектаваннем новых чэргаў. Пры будаўніцтве будуць выкарыстаны найноўшыя будаўнічыя тэхналогіі. "Рэсурсы: людскія, адміністрацыйныя, фінансавыя - ёсць, і мы будзем вельмі актыўна і дынамічна развіваць гэты праект", - падкрэсліў субяседнік.

Драгамір Карыч звярнуў увагу, што цэнтральным аб'ектам у праекце будзе міжнародны фінансавы цэнтр. Ён адзначыў, што чакаецца прыцягненне ў Мінск самых прэстыжных фінансавых карпарацый, банкаў, страхавых і лізінгавых кампаній з сусветным імем і якасцю работы. Прэзідэнт Беларусі падтрымаў прапанову, каб у цэнтры нараўне з сусветнымі гігантамі працавалі і беларускія фінансавыя кампаніі і банкі.

"Сёння праваліліся многія краіны па фінансавых пытаннях. Беларусь геапалітычна, стратэгічна і практычна з'яўляецца алмазам, дзе можна спакойна працаваць, дзе ёсць гарантыі, палітычная стабільнасць. Значыць, ёсць будучае. Тут няма ніякіх перападаў, з-за якіх варта расстройвацца і думаць, што будзе заўтра, паслязаўтра. Ёсць стратэгія дзяржавы, і мы ўпэўнены ў прыцягненні самых вялікіх фінансавых гігантаў свету менавіта ў Мінск", - сказаў дэпутат Народнай Скупшчыны (парламента) Сербіі.

"Гэта будзе карона супрацоўніцтва і брацкіх адносін Беларусі і Сербіі", - адзначыў Драгамір Карыч.

Ён таксама паведаміў, што праект выйграў самыя прэстыжныя ўзнагароды за канцэпцыю. Пры яго рэалізацыі па ініцыятыве прэзідэнтаў Беларусі і Сербіі будуць падключаны будаўнікі, інжынеры з былых югаслаўскіх рэспублік.

Драгамір Карыч запэўніў беларускіх грамадзян, што праект "жывы", рухаецца і будзе даведзены да дасканаласці.