Бізнес-навіны

З канвеера БЕЛАЗа сышоў 2000-ы самазвал грузападымальнасцю 220 т

Фота БЕЛАЗ

22 лютага, Мінск /Кар. БЕЛТА/. З канвеера БЕЛАЗа сышоў 2000-ы самазвал грузападымальнасцю 220 т, паведамілі БЕЛТА ў прэс-службе прадпрыемства.

Юбілейнаму самазвалу вырашана прысвоіць імя першага дырэктара БЕЛАЗа Мікалая Дзеравянкі, які кіраваў заводам з 1958 па 1961 год. Пад яго начальствам быў створаны аддзел галоўнага канструктара, дзе зарадзілася белазаўская школа канструявання, а таксама быў выраблены доследны ўзор кар'ернага самазвала - 27-тоннага БЕЛАЗ-540, які стаў тэхнічным прарывам.

"Мы заклалі традыцыю прысваення імёнаў выдатных людзей, якія працавалі і працуюць на нашым прадпрыемстве - усе нашы юбілейныя самазвалы цяпер будуць імяннымі, - заявіў генеральны дырэктар БЕЛАЗа Сяргей Нікіфаровіч. - БЕЛАЗ нясе адказнасць за якасць кожнага кар'ернага самазвала і асабліва ўважліва будзе сачыць за работай юбілейнай машыны. Мы ўпэўнены, што гэты самазвал пераходзіць у надзейныя рукі нашага партнёра, які забяспечыць эфектыўную работу беларускай тэхнікі на Кузбаскай зямлі.

Самазвалы грузападымальнасцю 220 т - адны з самых запатрабаваных. БЕЛАЗ ужо некалькі гадоў упэўнена займае палавіну сусветнага рынку ў гэтым сегменце грузападымальнасці. Штогод з канвеера кампаніі сыходзіць больш за 150 самазвалаў серыі БЕЛАЗ-7530. Гэтыя машыны цудоўна зарэкамендавалі сябе ў кар'ерах і вугальных разрэзах Казахстана, Узбекістана, Манголіі, Сербіі, ПАР, Індыі і іншых краін свету. Больш як 1,2 тыс. машын серыі БЕЛАЗ-7530 працуюць на радовішчах Расійскай Федэрацыі.

Сяргей Нікіфаровіч. Фота БелАЗ

Ва ўрачыстым мерапрыемстве, прысвечаным 2000-му самазвалу, таксама прыняў удзел дырэктар па транспарце АТ "Будсэрвіс" Віталь Пятроў, якому ўручылі сімвалічны ключ ад новай машыны. "Выпуск 2000-га БЕЛАЗа для нас таксама важная падзея, паколькі гэта мадэль - асноўная ў нашым парку тэхнікі. Я ўпэўнены, што гэты самазвал будзе працаваць прадукцыйна і з найвышэйшымі паказчыкамі, таму што ў яго ўкладзены ваша праца, ваша душа і ваша стаўленне да справы. Жадаю калектыву БЕЛАЗа далейшых працоўных перамог і дасягненняў", - сказаў ён.

"Будсэрвіс" - адзін са стратэгічных партнёраў БЕЛАЗа і адзін з лідараў здабычы вугалю ў Расійскай Федэрацыі. Сёння ў кампаніі эксплуатуюцца каля 250 кар'ерных самазвалаў рознай грузападымальнасці. У пачатку 2023 года БЕЛАЗ паставіць кампаніі яшчэ 15 новых 220-тонных самазвалаў.

Гісторыя самазвалаў класа грузападымальнасці 200-220 т пачалася ў 1992-1994 гадах, калі былі выраблены доследны ўзор і першая доследная партыя гэтых самазвалаў. У 2003 годзе стартавала серыйная вытворчасць новай 220-тоннай машыны БЕЛАЗ-75306, распрацаванай з улікам вопыту эксплуатацыі мадэлей папярэдніх пакаленняў. Соты 220-тоннік серыі БЕЛАЗ-7530 сышоў з канвеера прадпрыемства ў жніўні 2005 года, пяцісоты быў выпушчаны ў 2011 годзе, тысячны - у красавіку 2015-га, паўтаратысячны - у жніўні 2019 года.

версія для друку

зрабіць стартавай

дабавіць у выбранае