Бізнес-навіны

Іваноў: скорасць асваення новых тэхналогій - гэта аснова эканамічнага развіцця

18 мая, Мінск /Кар. БЕЛТА/. Скорасць асваення новых тэхналогій - гэта аснова эканамічнага развіцця. Такое меркаванне выказаў кіраўнік спраў Прэзідэнта Беларусі Валерый Іваноў на адкрыцці ІІ Міжнароднага лічбавага форуму #GBC (Дзяржава. Бізнес. Грамадзяне), які праходзіць у Мінску, перадае карэспандэнт БЕЛТА.

"Новы час патрабуе новых падыходаў, выкарыстання самых сучасных тэхналогій у вырашэнні пастаўленых перад намі няпростых задач. Як адзначаў кіраўнік дзяржавы ў Пасланні беларускаму народу і Нацыянальнаму сходу - стварэнне новых тэхналогій з'яўляецца адным з ключавых фактараў вызначэння развіцця сучаснага свету, - сказаў Валерый Іваноў. - Інфармацыйна-камунікацыйныя тэхналогіі трывала ўвайшлі ў наша жыццё. Воблачныя тэхналогіі, біяметрычная ідэнтыфікацыя, штучны інтэлект - гэта рэаліі сённяшняга дня, якія прызначаны служыць на карысць чалавека. Лічбавізацыя прымяняецца ў побыце, на вытворчасцях, у дзяржаўных структурах, бізнесе, міжнародных адносінах, банкаўскай сістэме, у цэлым у кожнай дзяржаве, якая паважае сябе".

Паводле яго слоў, скорасць асваення новых тэхналогій - гэта аснова эканамічнага развіцця. Вынікі такога асваення даюць магчымасць забяспечыць больш высокую якасць жыцця людзей. "Сёння многія, нават за межамі нашай краіны, адзначаюць вялікі рывок, які зрабіла Беларусь за апошнія дзесяцігоддзі ў частцы пераадолення лічбавага разрыву з вядучымі краінамі свету. Аб гэтым сведчаць высокія пазіцыі Беларусі ў розных сусветных рэйтынгах. Разам з тым мы не збіраемся спыняцца на дасягнутым. І гэты форум - прамое таму пацвярджэнне, мэта якога стварэнне дыялогавай пляцоўкі для абмеркавання самых актуальных пытанняў грамадства, а ў дыялогу, як вядома, нараджаецца ісціна", - падкрэсліў кіраўнік спраў Прэзідэнта Беларусі.

Валерый Іваноў падзякаваў арганізатарам форуму за магчымасць пераканацца ва ўсёабдымнай уключанасці ў працэсы лічбавай трансфармацыі кіраўнікоў дзяржорганаў і арганізацый, прадстаўнікоў органаў мясцовай выканаўчай улады. "Перакананы, што мы зможам выкарыстоўваць сучасныя дасягненні ў сферы інфармацыйна-камунікацыйных тэхналогій на карысць нашай краіны і ў далейшым заваёўваць усё новыя і новыя вяршыні ў гэтым і іншых напрамках нашай дзейнасці", - канстатаваў ён.

"Дасягненні дзяржавы і бізнесу для грамадзян" - пад такім слоганам сёння ў Нацыянальнай бібліятэцы Беларусі стартаваў II Міжнародны лічбавы форум #GBC (Дзяржава. Бізнес. Грамадзяне). У рабоце форуму прымаюць удзел кіраўнікі дзяржаўных органаў і арганізацый, прадстаўнікі IT-кампаній, банкаў, бізнесу, а таксама сацыяльнай сферы. Форум праводзіцца пад эгідай незалежнага рэгулятара ў сферы інфармацыйна-камунікацыйных тэхналогій, функцыі якога ажыццяўляе Аператыўна-аналітычны цэнтр пры Прэзідэнце Рэспублікі Беларусь. Арганізатарам мерапрыемства выступае Нацыянальны цэнтр абмену трафікам пры падтрымцы Нацыянальнага цэнтра электронных паслуг і беларускіх воблачных тэхналогій.

версія для друку

зрабіць стартавай

дабавіць у выбранае