Бізнес-навіны

У "Вялікім камені" прэзентавалі кампанію "Авіяцыйныя тэхналогіі і комплексы"

Фота ЗАТ "АТК"

28 снежня, Мінск /Кар. БЕЛТА/. У індустрыяльным парку "Вялікі камень" 23 снежня праведзены нефармальнае адкрыццё і прэзентацыя інавацыйнага кітайска-беларускага прадпрыемства "Авіяцыйныя тэхналогіі і комплексы", паведамілі БЕЛТА ў ЗАТ "АТК".

У цырымоніі адкрыцця прынялі ўдзел старшыня Прэзідыума Нацыянальнай акадэміі навук Беларусі Уладзімір Гусакоў і старшыня Беларускай гандлёва-прамысловай палаты Уладзімір Улаховіч.

У час адкрыцця была прадстаўлена вытворчая і навукова-даследчая пляцоўка ЗАТ "АТК" па распрацоўцы і вырабе беспілотных лятальных апаратаў (БЛА) мультыротарнага і самалётнага тыпаў, а таксама шматмэтавых беспілотных авіяцыйных комплексаў гібрыднага тыпу. Вытворчасць прадукцыі ажыццяўляецца ў цеснай кааперацыі з буйнейшымі сусветнымі пастаўшчыкамі беспілотнікаў з выкарыстаннем унікальных уласных распрацовак ЗАТ "АТК" у галіне электронікі і праграмнага забеспячэння.

Удзельнікі мерапрыемства абмеркавалі перспектывы развіцця ў Беларусі малой пілатуемай авіяцыі. Асобная ўвага была ўдзелена арганізацыі на базе ЗАТ "АТК" распрацоўкі і вытворчасці гірапланаў (аўтажыраў), сусветны рынак якіх штогод павялічваецца прыкладна на 5 працэнтаў.

Разам з тэхнікай, якая вырабляецца на базе прадпрыемства, прадстаўлена ўласная распрацоўка ЗАТ "АТК" - комплекс для правядзення стэндавых выпрабаванняў сістэм БЛА, які дае магчымасць арганізаваць высокі ўзровень уваходнага і выходнага кантролю тэхнікі і бартавога абсталявання.

Уладзімір Гусакоў высока ацаніў узровень арганізацыі вытворчасці ЗАТ "АТК", а таксама адзначыў неабходнасць прыярытэтнага развіцця ўласных беспілотных тэхналогій у тых напрамках, у якіх у беларускіх вучоных і інжынераў ёсць значныя канкурэнтныя перавагі.

У сваю чаргу Уладзімір Улаховіч звярнуў увагу на экспартны патэнцыял авіяцыйнай тэхнікі, якая распрацоўваецца і вырабляецца на прадпрыемстве. Дасягнута дамоўленасць аб садзейнічанні актыўнаму пашырэнню беларускай тэхнікі і тэхналогій у галіне дыстанцыйнага кіравання на замежных рынках.

версія для друку

зрабіць стартавай

дабавіць у выбранае