Бізнес-навіны

У беларуска-туркменскага ўзаемадзеяння ёсць перспектывы развіцця па ўсіх напрамках - Улаховіч

1 кастрычніка, Мінск /Кар. БЕЛТА/. У беларуска-туркменскага ўзаемадзеяння ёсць перспектывы развіцця па ўсіх напрамках. Аб гэтым ішла размова на анлайн-сустрэчы "Беларусь - Туркменістан: перспектывы двухбаковага супрацоўніцтва", паведамілі БЕЛТА ў прэс-службе Беларускай гандлёва-прамысловай палаты, якая сумесна з ГПП Туркменістана з'яўляецца арганізатарам гэтага мерапрыемства.

Старшыня БелГПП Уладзімір Улаховіч адзначыў цікавасць да анлайн-сустрэчы з боку беларускіх дзелавых колаў, што сведчыць аб перспектыўнасці развіцця беларуска-туркменскага ўзаемадзеяння па ўсіх напрамках. З улікам таго, што беларускія ўдзельнікі прадставілі практычна ўсе сферы эканомікі і прамысловасці, ён выказаў прапанову правесці серыю галіновых анлайн-сустрэч і семінараў, дзе прадстаўнікі бізнес-колаў Беларусі і Туркменістана змогуць дэталёва вывучыць магчымасці ўзаемавыгаднага супрацоўніцтва ў канкрэтных галінах.

У мерапрыемстве таксама прынялі ўдзел старшыня ГПП Туркменістана Даўлетгелдзі Рэджэпаў, пасол Беларусі ў Туркменістане Вячаслаў Бяскосты, пасол Туркменістана ў Беларусі Назаргулы Шагулыеў, прадстаўнікі Міністэрства прамысловасці і будаўнічай вытворчасці Туркменістана, Туркменскага саюза прамыслоўцаў і прадпрымальнікаў, Рухабацкага тэкстыльнага комплексу, холдынга "Белфармпрам". Да трансляцыі падключыліся больш за 50 кіраўнікоў і прадстаўнікоў беларускіх прадпрыемстваў розных сфер.

Спікеры прадставілі актуальную інфармацыю аб развіцці беларуска-туркменскага гандлёва-эканамічнага супрацоўніцтва, узнікшых бар'ерах, у прыватнасці ў лагістычнай сферы, а таксама аб мерах, якія прымаюцца для далейшага пашырэння двухбаковага ўзаемадзеяння, павелічэння тавараабароту і развіцця дзелавых кантактаў. Адбыліся прэзентацыі паспяховых праектаў бізнесу дзвюх краін у сферах фармацэўтыкі, прамысловай вытворчасці, тэкстыльнай прамысловасці.

версія для друку

зрабіць стартавай

дабавіць у выбранае