Бізнес-навіны

У Беларусі намалочана больш за 6,5 тыс. тон грэчкі

Фота з архiва

31 жніўня, Мінск /Кар. БЕЛТА/. У Беларусі намалочана больш за 6,5 тыс. тон грэчкі. Аб гэтым паведамілі БЕЛТА ў Міністэрстве сельскай гаспадаркі і харчавання.

У Беларусі на 31 жніўня сабрана больш за 96 працэнтаў убіраемых культур: з іх больш за 97 працэнтаў збожжавых каласавых і зернебабовых культур і 91 працэнт рапсу. Усяго намалочана збожжа з улікам рапсу 7015 тыс. т, у тым ліку 6045 тыс. т збожжавых каласавых і зернебабовых культур і 948 тыс. т рапсу.

Брэсцкая і Мінская вобласці завяршылі ўборку ранніх збожжавых каласавых і зернебабовых культур.

Гаспадаркі краіны пачалі ўборку крупяных культур: грэчкі намалочана больш за 6,5 тыс. т, а проса - каля 6 тыс. т.

Сяўба азімага рапсу на зерне ў Беларусі завершана. Таксама ўсе рэгіёны краіны закончылі церабленне лёну. Прадаўжаюцца работы па ўборцы льнотрасты, нарыхтавана каля 57 тыс. т.

Салома пасля ўборкі збожжавых каласавых і зернебабовых культур убрана на 65 працэнтах да скошаных плошчаў. Праведзена лушчэнне ржышча на 15 працэнтах да ўбранай плошчы.

Гаспадаркі краіны ўбіраюць бульбу. Накапана больш за 30,5 тыс. т. Ураджайнасць - каля 383 ц/га. Сабрана зялёнай масы кукурузы 1515 тыс. т.

версія для друку

зрабіць стартавай

дабавіць у выбранае