Бізнес-навіны

Цэнтр традыцыйнай кітайскай медыцыны адкрыецца ў "Вялікім камені" пад эгідай карпарацыі "Сінафарм"

21 жніўня, Мінск /Кар. БЕЛТА/. Цэнтр традыцыйнай кітайскай медыцыны адкрыецца ў Кітайска-беларускім індустрыяльным парку "Вялікі камень" пад эгідай буйнейшай кітайскай фармацэўтычнай карпарацыі Sinopharm. Гэта пытанне абмяркоўвалася сёння на сустрэчы намесніка міністра аховы здароўя Беларусі Барыса Андрасюка і кітайскай дэлегацыі, перадае карэспандэнт БЕЛТА.

У каментарыі пасля сустрэчы намеснік міністра адзначыў, што хутка плануецца падпісаць пагадненне аб адкрыцці такога цэнтра. Мяркуецца, што гэта будзе вядучы практыка-метадычны цэнтр традыцыйнай кітайскай медыцыны. "Гэты від медыцынскай дапамогі запатрабаваны. Мы гэта вітаем", - сказаў Барыс Андрасюк.

Ён адзначыў, што кітайскія калегі прывезлі ў Мінск чатырох дактароў, двух прафесараў і атэставаных практыкаў традыцыйнай кітайскай медыцыны.

Паводле слоў намесніка міністра, сёння ў Беларусі існуе дзевяць цэнтраў традыцыйнай кітайскай медыцыны. Яны адкрыты ў абласных цэнтрах, горадзе Мінску. У "Вялікім камені" такі цэнтр дзейнічае пад эгідай Цэнтра экспертыз і выпрабаванняў у ахове здароўя.

Што датычыцца прэпаратаў традыцыйнай кітайскай медыцыны, менавіта на пляцоўцы "Вялікага каменя" рэжым найбольшага спрыяння, адзначыў Барыс Андрасюк. Для рэгістрацыі ў далейшым створаны ўсе ўмовы. Цяпер вядуцца актыўныя перагаворы з кітайскім бокам.

На сустрэчы таксама абмяркоўвалася пытанне стажыровак. Паводле слоў намесніка міністра, беларускі бок зацікаўлены ў навучанні сваіх спецыялістаў, якое правядуць менавіта кітайскія эксперты. Цяпер разглядаецца некалькі варыянтаў такога супрацоўніцтва.

версія для друку

зрабіць стартавай

дабавіць у выбранае