Бізнес-навіны

Трактары і кашамір: пасол расказаў, якімі таварамі могуць абменьвацца Манголія і Беларусь

Батсух Баярсайхан. Фота з архiва

24 ліпеня, Мінск /Кар. БЕЛТА/. Манголію і Беларусь звязваюць даўнія дружалюбныя сувязі. Важнасць гэтага адзначыў карэспандэнту БЕЛТА Надзвычайны і Паўнамоцны Пасол Манголіі ў Рэспубліцы Беларусь Батсух Баярсайхан.

Дыпламат расказаў, што Манголія зацікаўлена ў актывізацыі адносін з Беларуссю на ўсіх узроўнях.

Як паведамлялася раней БЕЛТА, Прэзідэнт Манголіі Ухнаагійн Хурэлсух у віншаванні кіраўніка беларускай дзяржавы Аляксандра Лукашэнкі з Днём Незалежнасці падкрэсліў, што традыцыйна дружалюбныя адносіны і супрацоўніцтва з Беларуссю актыўна развіваюцца ў сферах гандлю, эканомікі, сельскай гаспадаркі і лёгкай прамысловасці. Мангольскі лідар выказаў упэўненасць, што далейшае двухбаковае супрацоўніцтва будзе толькі ўмацоўвацца і запрасіў Аляксандра Лукашэнку наведаць Манголію з візітам.

Пасол Манголіі ў сувязі з гэтым адзначыў: "Візіты на вышэйшым узроўні важныя для актывізацыі і пашырэння дружалюбных двухбаковых адносін".

Дыпламат адзначыў, што адносіны паміж дзвюма нашымі дзяржавамі былі добрымі з савецкіх часоў. Ажыццяўляліся пастаўкі беларускіх камбайнаў і трактароў у Манголію, яшчэ тады беларуская тэхніка добра сябе зарэкамендавала. Аснова для сувязей у адукацыйнай сферы была закладзена таксама ў той перыяд.

Разам з гэтым Батсух Баярсайхан выказаў меркаванне, што цяпер у яго краіне недастаткова інфармацыі аб тым, як развіваецца Беларусь, чаго дасягнула за гады незалежнасці, таму ўрадавыя, бізнес-дэлегацыі з Манголіі прыязджаюць знаёміцца з сучаснымі рэаліямі, наведваюць выстаўкі. Плануецца, што восенню група журналістаў з Манголіі прыедзе для знаёмства з Беларуссю.

"Шмат дэлегацый прыязджаюць з Манголіі. Не так даўно прадстаўнікі аграрнага сектара наведвалі "Белагра". Яны захоплены тым, што ў Беларусі ўсё спакойна, дружалюбнасць, якасныя прадукты харчавання. Бізнесмены з Манголіі з упэўненасцю гавораць, што з эканамічнага пункту гледжання можна шмат чаму павучыцца ў Беларусі", - адзначыў пасол Манголіі.

Паводле яго слоў, гандлёва-эканамічныя сувязі паміж нашымі краінамі паступова і бесперапынна развіваюцца. Напрыклад, заключаны буйны кантракт на пастаўку будаўнічых матэрыялаў (вокны, дзверы, падлогавыя пакрыцці). Вялікія перспектывы намеціліся ў сферы паставак у Манголію беларускай малочнай і мясной прадукцыі (сухое малако, сметанковае масла, сыры, каўбасы).

"Самае галоўнае - гэта якасць. Манголія - гэта краіна, якая імкліва развіваецца, і людзі глядзяць на якасць прадукцыі, якой карыстаюцца", - заўважыў Батсух Баярсайхан.

Ён таксама расказаў аб тым, што многія мангольскія тавары, у тым ліку кашамір, славяцца ва ўсім свеце і прадаюцца ў краіны Амерыкі, Еўропы, Азіі. Пасол лічыць, што кашаміравыя вырабы маглі б стаць цудоўным артыкулам паставак у Беларусь.

Батсух Баярсайхан - першы пасол Манголіі з рэзідэнцыяй у Мінску. Да гэтага паслы Манголіі былі ў Беларусі па сумяшчальніцтве.

Дыпламат упэўнены ў тым, што беларуска-мангольскія адносіны будуць у перспектыве развівацца яшчэ больш актыўна па многіх напрамках, у тым ліку ў галіне сельскай гаспадаркі, адукацыі, турызму.  

версія для друку

зрабіць стартавай

дабавіць у выбранае