Бізнес-навіны

Таварныя біржы Беларусі і Манголіі плануюць супрацоўнічаць у гандлі сельгаспрадукцыяй

Фота з архiва

21 мая, Мінск /Кар. БЕЛТА/. Беларуская ўніверсальная таварная біржа і Мангольская таварная біржа (MCE) маюць намер сумесна развіваць біржавы гандаль прадукцыяй сельскай гаспадаркі. Гэта тэма абмяркоўвалася ў час анлайн-сустрэчы паміж прадстаўнікамі БУТБ і MCE, арганізаванай бакамі з мэтай вызначэння магчымых напрамкаў узаемадзеяння, паведамілі БЕЛТА ў прэс-службе беларускай біржы.

Чакаецца, што аб'яднанне рэсурсаў, тэхналогій і вопыту дзвюх біржавых пляцовак надасць новы імпульс гандлёва-эканамічнаму супрацоўніцтву Беларусі і Манголіі. Пры гэтым асноўную ўвагу плануецца сфакусіраваць на прадукцыі аграпрамысловага комплексу, улічваючы значную ўдзельную вагу гэтага сектара ў структуры народнай гаспадаркі абедзвюх краін. На думку бакоў, зыходзячы з наменклатуры тавараў, прадстаўленых цяпер на беларускай і мангольскай біржах, найбольш перспектыўнымі пазіцыямі для паставак у Манголію з'яўляюцца цукар і малакапрадукты, у той час як у Беларусь мэтазгодна імпартаваць сыравіну для тэкстыльнай прамысловасці - перш за ўсё воўну і кашмір.

"Абмен вопытам, аналітычнай інфармацыяй і тэхналагічнымі напрацоўкамі дасць магчымасць павысіць эфектыўнасць функцыянавання біржавых платформ Беларусі і Манголіі, а сумесная работа па ўключэнні прадпрыемстваў дзвюх краін у біржавы гандаль забяспечыць істотны прырост узаемнага тавараабароту", - лічыць начальнік упраўлення знешнеэканамічнай дзейнасці БУТБ Аляксандр Башлій.

Па выніках перагавораў узгоднены візіт дэлегацыі MCE ў цэнтральны офіс БУТБ у чэрвені бягучага года для дэталёвага азнаямлення з асаблівасцямі арганізацыі і правядзення біржавых таргоў, а таксама выпрацоўкі плана сумесных дзеянняў у рамках абазначаных напрамкаў супрацоўніцтва.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

На сёння на БУТБ акрэдытаваны тры рэзідэнты Манголіі, адзін з якіх мае статус біржавога брокера. З пачатку 2024 года сума біржавых здзелак, ажыццёўленых мангольскімі кампаніямі, склала амаль $2,5 млн. Больш за 90 працэнтаў тавараабароту прыпала на экспарт беларускага цукру.

версія для друку

зрабіць стартавай

дабавіць у выбранае