Бізнес-навіны

26 снежня, Масква /БЕЛТА - ТАСС/. Тавараабарот паміж Расіяй і Беларуссю ў 2017 годзе дасягнуў $26 млрд. Аб гэтым сёння ў эфіры тэлеканала НТБ заявіў пасол Беларусі ў Маскве Ігар Петрышэнка.

"У бягучым годзе трэнд аднаўлення і росту эканомікі назіраецца як у Расійскай Федэрацыі, так і ў Рэспубліцы Беларусь. Асноўны індыкатар - узровень гандлёвых эканамічных адносін, узровень тавараабароту. Ён дасягнуў $26 млрд", - сказаў ён.

Пасол нагадаў, што Расія традыцыйна займае сур'ёзную долю ў знешнім гандлі Беларусі - каля 51 працэнта. "Мы не адстаём - уваходзім у пяцёрку асноўных гандлёвых партнёраў Расійскай Федэрацыі", - адзначыў Ігар Петрышэнка.

На пасяджэнні Савета міністраў Саюзнай дзяржавы, якое прайшло ў пачатку снежня, прэм'ер-міністр Беларусі Андрэй Кабякоў заяўляў, што знешнегандлёвы абарот дзвюх краін можа дасягнуць па выніках 2017 года паказчыка 2010 года - $28 млрд.