Бізнес-навіны
Субоцін: экспарт беларускіх прадуктаў харчавання з пачатку года склаў $4,2 млрд
4 кастрычніка, Мінск /Кар. БЕЛТА/. Экспарт беларускіх прадуктаў харчавання з пачатку года склаў $4,2 млрд, расказаў намеснік прэм'ер-міністра Аляксандр Субоцін у эфіры тэлеканала "Беларусь 1", паведамляе БЕЛТА.
"Калі ў мінулым годзе мы крыху недацягнулі да $6 млрд, то ў бягучым годзе хочам значна перасягнуць такі рубеж. На гэты момант за тры кварталы мы зрабілі ўжо $4,2 млрд экспарту прадуктаў харчавання і ідзём з дадатным сальда, якое значна перавышае $1 млрд", - адзначыў Аляксандр Субоцін.
Паводле яго слоў, на мінулым тыдні амаль кожны дзень у Саўміне збіраўся штаб па правядзенні палявых работ. "Гэта звязана перш за ўсё з кліматычнымі ўмовамі. У пачатку верасня мы ішлі з апярэджаннем, а тут некалькі тыдняў бесперапынных дажджоў, і ўсё спынілася. Нават сталі крыху адставаць у параўнанні з мінулым годам, і спатрэбіліся намаганні, каб нагнаць гэты ўзровень. Праводзілі сяўбу, дзе была магчымасць, наогул кругласутачна. Да 5 кастрычніка плануем завяршыць асноўную сяўбу, гэта значыць будзе недзе 90-95 працэнтаў ад усяго аб'ёму. А ў цэлым па краіне мы павінны завяршыць работы да 8 кастрычніка", - падкрэсліў намеснік прэм'ер-міністра.
Апошнім часам было шмат размоў аб няхватцы цукру на прылаўках у некаторых рэгіёнах краіны. "Гэты ажыятаж выкліканы штучна. У гэтым годзе мы пасеялі больш цукровых буракоў, чым у мінулым. Цяпер сабрана ўсяго 20 працэнтаў ураджаю і заводы толькі пачалі працаваць. Нам у год трэба максімум 360 тыс. т цукру на ўнутраны рынак, і мы гэта пытанне закрываем, уводзячы цукровыя буракі ў дзяржзаказ: 3 млн т сыравіны для 360 тыс. т цукру мы пасадзілі і збяром як дзяржзаказ, а ўсё астатняе - гэта ўжо прыбытак нашых прадпрыемстваў. Яны амаль 2 млн т буракоў дадаткова пасеялі, значыць, гэта недзе каля 300 тыс. т цукру, - прадоўжыў Аляксандр Субоцін. - Гэта ўсё наш экспартны патэнцыял. Значная частка цукру ўжо закантрактавана. Мы вырабляем у дзень каля 4,7 тыс. т цукру. Спажыванне цукру ў краіне на піку, калі людзі вараць варэнне, нарыхтоўваюць нейкі свой ураджай - было заўсёды 1,2 тыс. т, а ў сярэднім недзе 800-900 т".
Аляксандр Субоцін падкрэсліў, што ў беларускім цукры зацікаўлены многія краіны. Сярод іх Расія, Кыргызстан, Казахстан. "У мінулым годзе нам удалося трапіць у дзяржрэзерв КНР. Нашы кітайскія калегі, паглядзеўшы, што мы ўважліва выконваем абавязацельствы і на якасць нашага цукру, у гэтым годзе павялічылі аб'ём заказу да 30 тыс. т", - сказаў ён.
Намеснік прэм'ер-міністра таксама пракаменціраваў забяспечанасць беларускага спажыўца грэчкай. "У гэтым годзе мы пасеялі крыху больш грэчкі, каб забяспечыць сябе поўнасцю. Нягледзячы на больш нізкую ўраджайнасць, мы амаль палавіну ўжо сабралі - 16 тыс. т. Для ўнутранай патрэбнасці нам неабходна недзе 27-30 тыс. т грэчкі. Гэта насенне і крупы разам. Я думаю, што мы поўнасцю будзем забяспечаны сваёй грэчкай. І падкрэслю тут, што грэчка не з'яўляецца для нас экспартным таварам, таму мы сеем яе толькі для сябе, - акцэнтаваў увагу Аляксандр Субоцін. - Аднак у аснову мы, напэўна, ставім малочную галіну як самы высокамаржынальны прадукт. У гэтым годзе на адну жывёлу мы атрымалі прырост 63 кг і ў сярэднім недзе 1-2 працэнты плюсуем да мінулага года, а мінулы год быў вельмі нядрэнны па малаку, гэта значыць мы стабільна ідзём з павышэннем".
версія для друку
зрабіць стартавай
дабавіць у выбранае