Бізнес-навіны

Спецыялісты пракаменціравалі сітуацыю з пастаўкамі імпартнай сыравіны ў Беларусь ва ўмовах пандэміі

Міхаіл Жыгала

1 красавіка, Мінск /Кар. БЕЛТА/. У час чарговага пасяджэння ў прэс-цэнтры БЕЛТА праекта "Экспертнае асяроддзе" - "Лёгкая прамысловасць Беларусі: выклікі і рызыкі" спецыялісты пракаменціравалі сітуацыю з пастаўкамі імпартнай сыравіны ў Беларусь. Яны прадаўжаюцца, хоць не без лагістычных збояў з-за пандэміі COVID-19, паведаміў начальнік упраўлення арганізацыі гандлю і грамадскага харчавання МАРГ Міхаіл Жыгала.

МАРГ вядзе маніторынг таварапатокаў. "Пэўныя збоі ў пастаўках назіраюцца, але гэта, на наш погляд, абумоўлена ў тым ліку аб'ектыўнымі фактарамі. Нельга сказаць, што сыравіны няма наогул або яна не паступае ў краіну. Прысутнічаюць аб'ектыўныя лагістычныя збоі, недзе магчымы затрымкі пастаўкі, але ў цэлым тавар у рамках аптовага звяна паступае ў рэспубліку", - расказаў Міхаіл Жыгала.

Генеральны дырэктар ААТ "Баранавіцкае вытворчае баваўнянае аб'яднанне" ("Блакіт") Іван Турчак сказаў, што еўрапейскія краіны адгрузку сыравіны прыпынілі. Па іншых напрамках затрымкі ўзнікаюць з-за каранцінных мерапрыемстваў на граніцы. Пасля прыезду, напрыклад, у Турцыю дальнабойшчык на два тыдні ідзе на каранцін. "Калі раней сыравіна з Сярэдняй Азіі даходзіла на працягу тыдня - 10 дзён, то сёння трэба не менш як месяц. Гэта дадатковы выклік у частцы забеспячэння базавай сыравінай", - канстатаваў кіраўнік БВБА. На прадпрыемстве рыхтуюцца да некаторых цяжкасцей, якія давядзецца мінімізаваць.

Дэталёвы аналіз таварапатоку праз беларускую граніцу яшчэ не праводзіўся. Пакуль складана прывесці канкрэтныя лічбы, як на ім адбіліся меры, прынятыя краінамі-суседзямі з-за пандэміі каранавіруса.

Намеснік начальніка галоўнага ўпраўлення арганізацыі мытнага кантролю Дзяржаўнага мытнага камітэта Андрэй Шашкоў нагадаў, што рух фізічных асоб закрыты, для велікагрузаў такой забароны няма. Ён падкрэсліў, што беларуская мытня ў гэтых умовах робіць усё максімальна магчымае. У першачарговым парадку афармляюцца фуры з медыцынскімі таварамі.

версія для друку

зрабіць стартавай

дабавіць у выбранае