Бізнес-навіны

Снапкоў: лічым мэтазгодным стварыць зборачную вытворчасць беларускай тэхнікі ў Нікарагуа

13 снежня, Мінск /Кар. БЕЛТА/. Беларусь лічыць мэтазгодным стварыць зборачную вытворчасць тэхнікі ў Нікарагуа. Аб гэтым заявіў першы намеснік прэм'ер-міністра Мікалай Снапкоў у час сустрэчы з саветнікам прэзідэнта Нікарагуа па пытаннях інвестыцый, гандлю і міжнароднага супрацоўніцтва Лаўрэана Факунда Артэга Мурылья, перадае карэспандэнт БЕЛТА.

"Мы цэнім вашу актыўную пазіцыю ў адносінах да Беларусі. Вельмі рады, што кантакты з Нікарагуа актыўна развіваюцца. Дзве краіны, у якіх падобныя погляды на падзеі, што адбываюцца ў свеце, аб'ядноўваюць свае намаганні ў сумесным развіцці. Мы выбудоўваем свае пазіцыі зыходзячы з прынцыпаў суверэннай роўнасці, незалежнасці і ўзаемнай павагі. Мы ўдзячныя за пастаянную падтрымку Беларусі на міжнароднай арэне і з радасцю адказваем вам тым жа", - сказаў Мікалай Снапкоў.

Ён адзначыў, што палітычнае ўзаемадзеянне Беларусі і Нікарагуа знаходзіцца на больш высокім узроўні, чым эканамічнае. "Але тэндэнцыі апошняга часу ўсяляюць надзею, што мы істотна наросцім наша эканамічнае супрацоўніцтва на карысць развіцця дзвюх краін. І ў гэтым бачны ваш вялікі асабісты ўклад, за што вам вялікі дзякуй", - падкрэсліў першы віцэ-прэм'ер.

Прэм'ер-міністр Беларусі Раман Галоўчанка ўдзяляе асаблівую ўвагу развіццю ўзаемаадносін з Нікарагуа. "Праведзены ў ліпені гэтага года візіт даў магутны імпульс усім дзяржаўным органам для пашырэння ўзаемадзеяння з вашай краінай. Базавай кропкай з'яўляецца кантракт на пастаўку 700 адзінак тэхнікі. Спадзяюся, што мы не спынімся толькі на пастаўках тэхнікі, але і будзем развіваць абслугоўваючую базу. Таксама лічым мэтазгодным стварыць зборачную вытворчасць у Нікарагуа", - зрабіў акцэнт Мікалай Снапкоў.

"Прапануем не абмяжоўвацца толькі пастаўкамі прадукцыі машынабудавання і развіццём кампетэнцый Нікарагуа ў гэтай галіне. Варта ацаніць перспектывы супрацоўніцтва ў аграпрамысловым комплексе, медыцыне, адукацыі і культуры, у даследаваннях, развіцці тэхналогій і іншых сферах", - дадаў першы віцэ-прэм'ер.

Беларусь таксама зацікаўлена ў імпарце з Нікарагуа кавы, бананаў, морапрадуктаў.

версія для друку

зрабіць стартавай

дабавіць у выбранае