Бізнес-навіны
Снапкоў: Беларуска-кітайскі тавараабарот за мінулыя 25 гадоў вырас амаль у 100 разоў
19 студзеня, Мінск /Аліна Грышкевіч - БЕЛТА/. Беларуска-кітайскі тавараабарот за мінулыя 25 гадоў вырас амаль у 100 разоў. Аб гэтым заявіў намеснік кіраўніка Адміністрацыі Прэзідэнта Беларусі Мікалай Снапкоў, выступаючы 19 студзеня на ўрачыстым мерапрыемстве з нагоды 25-годдзя ўстанаўлення дыпадносін паміж Беларуссю і КНР, перадае карэспандэнт БЕЛТА.
"У эканоміцы мы ідзём па шляху эвалюцыі - ад простага гандлю да рэалізацыі буйных інвестыцыйных праектаў з крэдытнай падтрымкай з боку Кітая, - адзначыў Мікалай Снапкоў. - За мінулыя 25 гадоў наш тавараабарот узрос амаль у 100 разоў. Інвестыцыі за мінулую пяцігодку выраслі ў 4 разы (больш як $1 млрд), а прамыя - у 13 разоў".
Паводле слоў намесніка кіраўніка Адміністрацыі Прэзідэнта, Беларусь і Кітай уступілі ў новы этап аб'яднання вытворчых патэнцыялаў, стварэння сумесных прадпрыемстваў як у Кітаі, так і ў Беларусі, сумеснага выхаду на рынкі трэціх краін. Сумеснымі намаганнямі будуецца Кітайска-беларускі індустрыяльны парк "Вялікі камень", які, на думку Старшыні КНР Сі Цзіньпіна, павінен стаць сапраўднай "жамчужынай" Эканамічнага пояса Шаўковага шляху.
Пры гэтым Мікалай Снапкоў акцэнтаваў увагу на важнасці таго, што Беларусь і КНР выйшлі на новы ўзровень ваеннага і ваенна-тэхнічнага супрацоўніцтва.
версія для друку
зрабіць стартавай
дабавіць у выбранае