Бізнес-навіны

Шлычкоў: рэалізацыя сумесных праектаў з Кітаем дасць магчымасць выйсці на стварэнне новых высокатэхналагічных вытворчасцей

Фота з архiва

11 ліпеня, Мінск /Кар. БЕЛТА/. Рэалізацыя сумесных праектаў з Кітаем дасць магчымасць выйсці на стварэнне новых высокатэхналагічных вытворчасцей. Аб гэтым заявіў старшыня Дзяржаўнага камітэта па навуцы і тэхналогіях Сяргей Шлычкоў у час візіту беларускай дэлегацыі ў Пекін на чале з першым намеснікам прэм'ер-міністра Беларусі Мікалаем Снапковым, паведамілі карэспандэнту БЕЛТА ў прэс-службе камітэта.

У праграме візіту - удзел у мерапрыемствах пятага пасяджэння Беларуска-Кітайскага міжурадавага камітэта па супрацоўніцтве.

"Прапануем вывесці наша навукова-тэхнічнае ўзаемадзеянне на новы ўзровень і на сістэмнай аснове прапрацоўваць шляхі камерцыялізацыі сумесных праектаў. Для гэтага мы прапануем разгледзець магчымасці стварэння сумесных высокатэхналагічных вытворчасцей па шэрагу напрамкаў, якія ўяўляюць узаемны інтарэс. Такімі напрамкамі, на нашу думку, могуць стаць робататэхніка, электратранспарт, медыцынскае абсталяванне і фармацэўтыка, лазерная тэхніка. Для арганізацыі сумесных вытворчасцей мы можам выкарыстоўваць створаную намі інавацыйную інфраструктуру, у прыватнасці, індустрыяльны парк "Вялікі камень" недалёка ад Мінска, тэхнапарк у горадзе Чанчунь і іншыя пляцоўкі", - падкрэсліў Сяргей Шлычкоў.

Вопыт стварэння сумесных прадпрыемстваў у Беларусі і Кітая ўжо ёсць. Так, у якасці прыкладу старшыня ДКНТ нагадаў аб стварэнні ЗАТ "Авіяцыйныя тэхналогіі і комплексы", якое паспяхова працуе на пляцоўцы індустрыяльнага парка "Вялікі камень".

"Са стварэннем механізма камерцыялізацыі мы, па сутнасці, створым поўны інавацыйны цыкл ад ідэі да выпуску высокатэхналагічнай прадукцыі. Лічу, што навукова-тэхнічнае супрацоўніцтва з'яўляецца адным з перспектыўных напрамкаў пашырэння ўзаемадзеяння Беларусі і Кітая, а рэалізацыя сумесных праектаў дасць магчымасць выйсці на стварэнне новых высокатэхналагічных вытворчасцей і прадпрыемстваў. Мы верым у перспектывы нашага навукова-тэхнічнага супрацоўніцтва і прыкладзём усе намаганні для павышэння яго эфектыўнасці", - заявіў Сяргей Шлычкоў.

У ходзе візіту плануецца наведванне кіраўніком ДКНТ тэхнапарка Чжунгуаньцунь, а таксама высокатэхналагічных кампаній у галіне прыборабудавання і мікраэлектронікі. Акрамя таго, у Міністэрстве навукі і тэхналогій КНР запланавана сустрэча з міністрам ведамства Ван Чжыганам.

версія для друку

зрабіць стартавай

дабавіць у выбранае