Бізнес-навіны

Рэзідэнты СЭЗ "Гроднаінвест" у першым квартале 2023 года ўвялі ў эксплуатацыю 9 новых аб'ектаў

Фота з архіва. ААТ "Слоніммэбля"

6 красавіка, Гродна /Кар. БЕЛТА/. Рэзідэнты СЭЗ "Гроднаінвест" у першым квартале 2023 года ўвялі ў эксплуатацыю 9 новых вытворчых і інжынерных аб'ектаў. Аб гэтым БЕЛТА паведамілі ў прэс-службе СЭЗ.

"У першым квартале 2023 года рэзідэнты СЭЗ "Гроднаінвест" у рамках рэалізацыі інвестыцыйных праектаў на індустрыяльных пляцоўках свабоднай эканамічнай зоны ў Гродзенскай вобласці ўвялі ў эксплуатацыю 9 вытворчых і інжынерных аб'ектаў на агульную суму больш за Br8 млн. Так, ТАА "Аквапак Індастрыял" устанавіла аўтаматычную лінію для зборкі рашотак у рамках праекта па стварэнні вытворчасці ўпакоўкі і гібкай этыкеткі. ААТ "Завод "Оптык" у ходзе мадэрнізацыі валаконнай вытворчасці ўвяло ў эксплуатацыю шклаварную печ", - расказалі ў арганізацыі.

Там таксама адзначылі, што прадпрыемства "Слоніммэбля" пры мадэрнізацыі вытворчасці ўстанавіла новае абсталяванне, Слонімскі кардонна-папяровы завод "Альберцін" рэканструяваў лакальныя ачышчальныя збудаванні. "СТАА "Белгрынлайн" запусціла новую лінію па вытворчасці і ўпакоўцы вільготных сурвэтак. ВГ ТАА "Тайфун" у ходзе пашырэння вытворчасці будаўнічых сумесей правяло рэканструкцыю складскіх пляцовак. РУП "Конус" завяршыла будаўніцтва будынка адміністрацыйна-бытавога комплексу", - дадалі ў СЭЗ.

"Гродзенскі шклозавод у рамках праекта па стварэнні вытворчасці шкляной тары з выкарыстаннем інавацыйных энергаэфектыўных і рэсурсазберагальных тэхналогій арганізаваў першае распальванне печы і пачаў працэс наладкі абсталявання і прамысловых выпрабаванняў вытворчых ліній. Прадпрыемства-рэзідэнт "Смаргонскі агрэгатны завод" на гэтым этапе праводзіць тэхнічнае ўзбраенне для аўтаматызацыі вытворчых працэсаў, павелічэння аб'ёмаў выпуску прадукцыі і ўкаранення новых мадэлей сельгастэхнікі", - сказалі ў СЭЗ "Гроднаінвест". Там таксама звярнулі ўвагу, што праект па ўзвядзенні міжнароднага лагістычнага хаба з аб'ектамі аптовага і рознічнага гандлю шырокай наменклатуры тавараў плануе запусціць новы рэзідэнт СЭЗ ТАА "ЗахадТрансМяжа".

версія для друку

зрабіць стартавай

дабавіць у выбранае