Бізнес-навіны

Рэчыцкі метызны завод асвоіў 8 імпартазамяшчальных пазіцый крапежных вырабаў

Фота з архiва

7 верасня, Рэчыца /Кар. БЕЛТА/. Рэчыцкі метызны завод асвоіў восем імпартазамяшчальных пазіцый крапежных вырабаў для выкарыстання ў канструкцыі халадзільных герметычных кампрэсараў серыі СТ і СН вытворчасці ЗАТ "Атлант"-БСЗ (г.Баранавічы), паведамілі карэспандэнту БЕЛТА на прадпрыемстве.

 Гэтыя вырабы ўстанаўліваюцца ў бытавых халадзільніках і маразільніках. Размова пра шрубы рознай наменклатуры, а таксама апору спружыны для Баранавіцкага станкабудаўнічага завода (БСЗ) - філіяла ЗАТ "Атлант". Вытворца брэндавай тэхнікі звярнуўся на рэчыцкае прадпрыемства, дзе запэўнілі, што змогуць наладзіць выпуск неабходных крапежных вырабаў. Раней гэтыя пазіцыі на станкабудаўнічым заводзе імпартавалі з Італіі і Славеніі. На метызным жа новую прадукцыю асвоілі ў самы кароткі тэрмін. Пры гэтым быў закуплены дадатковы інструмент, таксама неабходная аснастка выканана на ўласнай інструментальнай вытворчасці. Цяпер толькі апоры спружыны адгружаюць штомесяц каля 6 т.

Імпартазамяшчальны вектар на Рэчыцкім метызным заводзе гэтымі днямі прапрацоўваецца адразу па некалькіх напрамках. Напрыклад, ідуць перагаворы з прадстаўнікамі АЎТАВАЗа і КАМАЗа, якім неабходна метызная прадукцыя са спецыфічнымі характарыстыкамі.

Як удакладнілі на прадпрыемстве, санкцыйныя абмежаванні ў цэлым не паўплывалі на аб'ёмы выпуску крапежнай прадукцыі. Удалося аператыўна пераарыентаваць вытворчасць пад попыт. Па такой жа схеме спрацавалі і па экспартных напрамках. Калі раней краіны Заходняй Еўропы займалі прыкладна трэць экспартных адгрузак, цяпер партыі запатрабаванай прадукцыі ідуць правераным часам партнёрам у Расійскай Федэрацыі, а таксама ў новыя рэгіёны.

Рэчыцкі метызны завод працуе ў кругласутачным рэжыме без выхадных. Да таго ж прадаўжаецца тэхнічнае пераўзбраенне і мадэрнізацыя за кошт уласных сродкаў. Так, пуска-наладачныя работы праводзяцца на новай гальванічнай лініі. Яе запуск з магчымасцю цынкавання метровай шпількі дазволіць значна нарасціць аб'ёмы выпуску прадукцыі.

Прапрацоўваюцца пытанні мадэрнізацыі лініі для нанясення цынк-ламельнага пакрыцця. Таксама на месцы вытворчага корпуса 1912 года пабудовы ўзводзяцца новыя плошчы, за кошт якіх будуць пашыраны магчымасці крапежнага падраздзялення. Перспектыва ўводу - 2023 год.

На Рэчыцкім метызным заводзе працуе звыш 2 тыс. чалавек. Штогод у калектывы падраздзяленняў прыходзяць маладыя спецыялісты. Так, у 2021 годзе рады металургаў папоўнілі 15 маладых спецыялістаў рознага профілю, у гэтым чакаецца сем.

ААТ "Рэчыцкі метызны завод" вядзе сваю гісторыю з 1912 года. У бягучым годзе прадпрыемства адзначае 110-годдзе. Прадукцыя завода ідзе як на ўнутраны рынак, так і на экспарт.

версія для друку

зрабіць стартавай

дабавіць у выбранае