Бізнес-навіны

Развіццё аграгарадкоў, будаўніцтва сацжылля і школ. Што Беларусь прапануе Ніжагародскай вобласці

Фота з архiва

2 лютага, Мінск /Кар. БЕЛТА/. Першы намеснік міністра архітэктуры і будаўніцтва Алег Швец расказаў, што Беларусь прапануе Ніжагародскай вобласці ў сферы будаўніцтва. Аб гэтым ён паведаміў журналістам па выніках візіту ўрадавай дэлегацыі на чале з прэм'ер-міністрам Раманам Галоўчанкам у Ніжні Ноўгарад, паведамляе карэспандэнт БЕЛТА.

"Сёння мы бачым тры напрамкі развіцця супрацоўніцтва. У Ніжнім Ноўгарадзе вялікая праграма сацыяльнага жылля. Мы замацавалі дзяржаўнае вытворчае аб'яднанне "Мінскбуд" для рэалізацыі гэтага праекта. У прыватнасці, "МАПІД" - наш флагман домабудавання - ужо правёў пэўныя перагаворы. Мы плануем, што ў наступным годзе першы сацыяльны дом будзе ўведзены", - сказаў Алег Швец.

Яшчэ адзін перспектыўны напрамак - будаўніцтва дзвюх школ. "Па адной з іх мы падышлі ўжо да стадыі завяршэння праектавання, па другой таксама ёсць дамоўленасці", - адзначыў першы намеснік міністра.

Трэці напрамак - развіццё аграгарадкоў. "Мы прапанавалі варыянты домакамплектаў, прапанавалі паказаць свой вопыт і першы, пілотны, праект поўнасцю запраектаваць, пачынаючы ад горадабудаўнічай дакументацыі да завяршэння поўнага цыкла па аб'екце. Партнёры зацікавіліся. Чакаем у першым квартале іх прыбыцця, каб яны паглядзелі на месцы, вывучылі вопыт", - дадаў Алег Швец.

версія для друку

зрабіць стартавай

дабавіць у выбранае