Бізнес-навіны

16 кастрычніка, Мінск /Кар. БЕЛТА/. Прырост запасаў нафты ў Беларусі да 2020 года складзе 3 млн т, паведаміў у інтэрв'ю карэспандэнту БЕЛТА міністр прыродных рэсурсаў і аховы навакольнага асяроддзя Андрэй Худык.

"З улікам праведзеных геолага-разведачных работ чакаецца, што да 2020 года прырост запасаў нафты складзе 3 млн т і будуць выяўлены новыя ўчасткі, перспектыўныя для здабычы вуглевадароднай сыравіны. У бягучай пяцігодцы работы па пошуку новых пакладаў вуглевадародаў будуць прадоўжаны з прымяненнем новых метадаў і тэхналогій, якія паспяхова прымяняюцца ў краінах СНД - бурэнне свідравін пад узрывы, вібрацыйная сейсмаразведка, правядзенне свідравінных даследаванняў метадам вертыкальнага сейсмапрафілявання", - сказаў Андрэй Худык.

Ён адзначыў, што пошук радовішчаў нафты - доўгі і затратны працэс. "Далёка не ўсе пошукавыя свідравіны прыводзяць да адкрыцця пакладаў нафты. Паводле статыстыкі, на тры-пяць "сухіх" свідравін прыпадае адна паспяховая. Бурэнне адной свідравіны займае ў сярэднім паўгода. Да таго, як знайсці радовішча нафты з дастатковымі запасамі, неабходна правесці пошукавыя работы, гэта значыць знайсці нафтаносную структуру і падрыхтаваць яе да глыбокага бурэння. Магчымы выпадкі, калі структура не пацвярджаецца, бывае, структура ёсць, а калектар адсутнічае. Гэта - задача з многімі невядомымі, прадбачыць, будзе нафта або не, немагчыма", - дадаў міністр.

Андрэй Худык таксама расказаў аб перспектывах Беларусі па здабычы сланцавага газу, звязаных з рэалізацыяй канцэсійнага дагавора па геалагічным вывучэнні васьмі ўчасткаў нетраў для выяўлення радовішчаў рассеянага вуглевадароднага (сланцавага) газу і іншых вадкіх і газападобных гаручых карысных выкапняў у нізкакандыцыйных калектарах. "Каб гаварыць аб перспектывах здабычы гэтага віду сыравіны, неабходна правесці ўвесь комплекс геолага-разведачных работ, уключаючы распрацоўку тэхніка-эканамічнага абгрунтавання мэтазгоднасці распрацоўкі радовішча. Таксама неабходна адзначыць, што атрыманне сланцавага газу і сланцавай нафты патрабуе прыцягнення адпаведных тэхналогій. Шмат у чым пытанне разгляду мэтазгоднасці здабычы сланцавага газу і сланцавай нафты вызначаецца кан'юнктурай цэн на вуглевадародную сыравіну", - растлумачыў ён.

У Беларусі адкрыты 83 радовішчы нафты і газавага кандэнсату. Усе яны размешчаны ў межах Прыпяцкага прагіну (Гомельская вобласць).