Бізнес-навіны

Прамкааперацыя, беларуская тэхніка, будаўніцтва: што прапанаваў Крутой Свярдлоўскай вобласці

Пасол Дзмітрый Крутой правёў сустрэчу з губернатарам рэгіёна Яўгенам Куйвашавым. Фота Пасольства Беларусі

17 лютага, Масква /Эдуард Півавар - БЕЛТА/. Пасол Беларусі ў Расіі Дзмітрый Крутой наведаў з рабочым візітам Свярдлоўскую вобласць, паведамілі БЕЛТА ў прэс-службе дыппрадстаўніцтва.

На сустрэчы з губернатарам рэгіёна Яўгенам Куйвашавым пасол канстатаваў, што сярод расійскіх рэгіёнаў Свярдлоўская вобласць была і застаецца адным з прыярытэтных гандлёвых партнёраў Беларусі. "Тавараабарот Рэспублікі Беларусь са Свярдлоўскай вобласцю ў 2022 годзе вырас на 52,1 працэнта. Пры гэтым беларускі экспарт павялічыўся на 63,1 працэнта, а імпарт - на 39,1 працэнта. Думаю, што гэта добры вынік сумеснай работы. Разам з тым час не стаіць на месцы, і сёння нам неабходна вызначыць тыя напрамкі, па якіх можна і трэба прыбавіць", - сказаў ён.

Сярод асноўных пунктаў росту Дзмітрый Крутой выдзеліў прамысловую кааперацыю. "Гэта перш за ўсё сумесная вытворчасць рухавіка для БЕЛАЗа на Уральскім дызель-маторным заводзе і вытворчасць спецыяльных машын для бурэння свідравін на шасі МАЗ у Верхняй Салдзе (Свярдлоўская вобласць), новыя праекты прымянення рухавікоў Мінскага маторнага завода, пастаўкі ў абодва бакі розных аўтакампанентаў", - адзначыў пасол.

"Другое - пастаўкі пасажырскай, дарожнай, камунальнай і грузавой тэхнікі. Яскравы прыклад такога супрацоўніцтва - сумесны праект па абнаўленні тралейбуснага парка Екацярынбурга. Гатовы ісці далей", - запэўніў Дзмітрый Крутой.

Паводле слоў пасла, яшчэ адзін напрамак для супрацоўніцтва - энергетыка. Уся работа ў гэтым напрамку таксама разглядаецца праз прызму імпартазамяшчэння. Энергетыкі Беларусі і Свярдлоўскай вобласці стварылі адпаведны савет. Адпрацоўваюцца пытанні ўзаемных паставак рознага абсталявання. Вялікі патэнцыял для росту ўзаемадзеяння маецца і ў галіне сельскай гаспадаркі. "У сувязі з гэтым пацвярджаем зацікаўленасць у нарошчванні паставак у рэгіён прадукцыі сельгасмашынабудавання (якая па сваіх якасцях не ўступае сусветным аналагам) у тым ліку з прымяненнем сучасных фінансавых механізмаў, уключаючы лізінг і льготнае крэдытаванне", - адзначыў дыпламат.

Ён таксама канстатаваў, што пакуль не раскрыты ў поўнай меры патэнцыял супрацоўніцтва ў будаўнічай сферы і ў галіне жыллёва-камунальнай гаспадаркі. "Такія беларускія прадпрыемствы, як "Магілёўліфтмаш", "Цепласіла", "Палімерканструкцыя" добра вядомы ў Свярдлоўскай вобласці. Аднак у будаўніцтве нам не ўдалося пакуль рэалізаваць сумесных праектаў. Гатовы прадоўжыць размову на такую тэму. РУП "Белбудцэнтр", ААТ "Будкомплекс" актыўна працуюць у іншых рэгіёнах Расіі, у тым ліку ў праектах, якія арганізуюцца на прынцыпах дзяржаўна-прыватнага партнёрства з рэгіянальнымі будаўнічымі кампаніямі. Ведаем, што такія механізмы атрымліваюць у вас усё большае развіццё", - рэзюмаваў Дзмітрый Крутой.

Перагаворы з губернатарам сталі апошнім пунктам праграмы візіту пасла. Да гэтага ён сустрэўся з кіраўніцтвам АТ "Уральскі завод грамадзянскай авіяцыі", дзе абмеркаваў пытанні кааперацыйнага супрацоўніцтва завода з прамысловымі прадпрыемствамі Беларусі. АТ "УЗГА" ажыццяўляе рэалізацыю інвестыцыйнага праекта па лакалізацыі вытворчасці малой авіятэхнікі з выкарыстаннем кампазітных матэрыялаў у АТ "Асаблівая эканамічная зона "Тытанавая даліна" ў Свярдлоўскай вобласці. Прадпрыемства вырабляе вучэбна-трэніровачныя самалёты DA-42NG, ДА-42Т і самалёт Л-410УВП-Е20. УЗГА таксама ажыццяўляе распрацоўку турбавінтавога 44-мясцовага рэгіянальнага самалёта ТВРС-44 "Ладага", лёгкага мнагамэтавага самалёта ЛМС-901 "Байкал", вучэбна-трэніровачнага самалёта УТС-800. "Шэраг беларускіх прадпрыемстваў могуць прапанаваць сваю прадукцыю для стварэння гэтай авіятэхнікі", - растлумачылі ў дыпмісіі.

Наступным прадпрыемствам, якое наведаў пасол, стаў Уральскі турбінны завод. "У Беларусі спецыялісты завода ўдзельнічаюць у інжынерным суправаджэнні выканання капітальных рамонтаў паравых турбін, а таксама аказваюць дапамогу ў падрыхтоўцы тэхнічных рашэнняў па павышэнні эфектыўнасці і надзейнасці ўжо ўстаноўленага абсталявання. З апошніх праектаў - рэканструкцыя Мінскай ЦЭЦ-3, рэканструкцыя турбаагрэгата і рамонтна-дыягнастычныя работы на Гродзенскай ЦЭЦ-2, а таксама ўкараненне тэхнічных рашэнняў для павышэння надзейнасці і манеўранасці паравой турбіны Бярозаўскай ДРЭС", - адзначылі ў прэс-службе.

На сустрэчы з кіраўніцтвам ТАА "Уральскі дызель-маторны завод" Дзмітрый Крутой абмеркаваў пытанні развіцця супрацоўніцтва расійскага прадпрыемства з ААТ "БЕЛАЗ", у тым ліку па пастаўках рухавікоў.

Акрамя таго, пасол прыняў удзел у нарадзе па абмеркаванні канцэпцыі нацыянальнай праграмы Рэспублікі Беларусь на міжнароднай прамысловай выстаўцы "ІНАПРАМ-2023". Выстаўка пройдзе ў Екацярынбургу з 10 па 13 ліпеня, Беларусь будзе ўдзельнічаць у ёй у статусе краіны-партнёра.

версія для друку

зрабіць стартавай

дабавіць у выбранае