Бізнес-навіны

Прадпрыемствы лясной галіны Беларусі плануюць больш актыўна асвойваць рынкі краін Азіі

Фота з архiва

11 лістапада, Мінск /Кар. БЕЛТА/. Прадпрыемствы лясной галіны Беларусі плануюць больш актыўна асвойваць рынкі краін Азіі. Аб гэтым паведамілі БЕЛТА ў прэс-службе Міністэрства лясной гаспадаркі.

У час чарговай апаратнай нарады міністр лясной гаспадаркі Віталь Дрожжа звярнуў увагу кіраўніцтва УП "Беллесэкспарт" на работу з замежнымі партнёрамі, у прыватнасці на азіяцкім напрамку. На думку міністра, яе неабходна актывізаваць. "Напрыклад, Кітай для лесагаспадарчых устаноў з'яўляецца адным з важнейшых партнёраў. Нягледзячы на тое, што асноўная доля экспарту сёння прыпадае на еўрапейскія краіны, менавіта кітайскі рынак дэманструе прыкметны рост. Так, за 10 месяцаў гэтага года ў КНР было пастаўлена прадукцыі на суму $7,5 млн. Гэта ў 2,2 раза больш, чым за аналагічны перыяд мінулага года", - адзначана на нарадзе.

Росту продажаў у Кітай садзейнічала ўдасканаленне ўмоў паставак. У прыватнасці, наладжана адпраўка грузаў чыгуначным транспартам, што дало магчымасць у два разы скараціць час іх дастаўкі. Цяпер перад галіной стаіць задача пашырыць асартымент прадукцыі, якая пастаўляецца ў Кітай. Напрыклад, перспектыўны паліўныя гранулы, масавая вытворчасць якіх была запушчана ў галіне ў гэтым годзе. Яшчэ адно важнае пытанне - выхад на канечных спажыўцоў. Як адзначылі на нарадзе, пэўныя поспехі ў гэтым напрамку ёсць, аднак аб поўным вырашэнні праблемы пакуль гаварыць рана.

"Паступаюць паведамленні, што, напрыклад, у Вялікабрытаніі прадукцыя беларускай вытворчасці часта прадаецца ва ўпакоўках фірм краін Балтыі, пры гэтым дзякуючы высокай якасці карыстаецца там вялікім попытам. Узнікае пытанне: чаму мы не працуем там самі і ўпускаем частку грошай?" - назваў праблему міністр і запатрабаваў актывізаваць работу ў гэтым напрамку.

Арганізацыі Мінлясгаса экспартуюць тавары і паслугі больш як у 30 краін.

версія для друку

зрабіць стартавай

дабавіць у выбранае