Бізнес-навіны

Прадпрыемствы "Беллегпрама" прадстаўлены на тэкстыльнай выстаўцы ў Ташкенце

Фота прэс-службы канцэрна "Беллегпрам"

27 мая, Мінск /Кар. БЕЛТА/. Беларуская дэлегацыя прымае ўдзел у міжнароднай выстаўцы UzTextileExpo-2021 у Ташкенце, паведаміла карэспандэнту БЕЛТА прэс-сакратар канцэрна "Беллегпрам" Марына Васькевіч.

У склад дэлегацыі на чале са старшынёй "Беллегпрама" Таццянай Лугіной увайшлі прадстаўнікі вядучых прадпрыемстваў, у тым ліку Баранавіцкага вытворчага баваўнянага аб'яднання, прадпрыемства "Белвест", Мінскага вытворчага гарбарнага аб'яднання, пінскага "Палесся", а таксама члены Асацыяцыі лёгкай прамысловасці Беларусі.

Таццяна Лугіна выступіла з дакладам на канферэнцыі Uzbekistan Textile Conference. Таксама прыняла ўдзел у адкрыцці міжнароднай выстаўкі тэкстыльнай і моднай індустрыі UzTextileExpo, дзе падкрэсліла: "Прыемна, што нарэшце сёння, на гэтай пляцоўцы, ёсць магчымасць сустрэцца афлайн дзясяткам прадстаўнікоў лёгкай прамысловасці розных краін, усталяваць дзелавыя кантакты, якія парушыліся з-за пандэміі, адкрыць новыя імёны і наладзіць узаемадзеянне бізнесаў. Перыяд COVID-19 змяніў шмат што ў галіне - пачынаючы ад рынкаў і заканчваючы паводзінамі спажыўца, таму важна абмеркаваць, як галіна будзе існаваць у новых рэаліях".

Акрамя таго, прайшлі перагаворы з асацыяцыямі "Узтэкстыльпрам" і "Узчармсаноат", шэрагам тэкстыльных кампаній і прадпрыемстваў па перапрацоўцы гарбарнай сыравіны. Заўтра работа дэлегацыі прадоўжыцца.

У бягучым годзе выстаўка сабрала каля 100 кампаній і брэндаў з ключавых краін, у ліку якіх Беларусь, Рэспубліка Карэя, Расія, Таджыкістан, Турцыя, Афганістан і Узбекістан. Экспазіцыя выстаўкі прадстаўляе ўвесь асартыментны спектр тавараў тэкстыльнай і лёгкай прамысловасці: сыравіна, бавоўнавая і сумесевая пража, суравыя і гатовыя тканіны, трыкатажнае палатно, фурнітуру і матэрыялы для тэкстыльнай вытворчасці, а таксама гатовую тэкстыльную прадукцыю - адзенне, трыкатаж, панчошна-шкарпэтачныя вырабы, дамашні тэкстыль, падлогавыя пакрыцці і інш.

версія для друку

зрабіць стартавай

дабавіць у выбранае