Бізнес-навіны

Петрышэнка 22-23 красавіка прыме ўдзел у пасяджэнні Савета ЕЭК

21 красавіка, Мінск /Кар. БЕЛТА/. Намеснік прэм'ер-міністра, член Савета Еўразійскай эканамічнай камісіі ад Беларусі Ігар Петрышэнка 22-23 красавіка прыме ўдзел у пасяджэнні Савета ЕЭК у рэжыме відэаканферэнцыі, паведамілі БЕЛТА ў прэс-службе ўрада.

У парадак дня ўключана 35 пытанняў у галіне міжнароднай дзейнасці, тэхнічнага рэгулявання, мытнага і тарыфнага рэгулявання. Плануецца адобрыць праект рашэння Вышэйшага Еўразійскага эканамічнага савета "Аб асноўных арыенцірах макраэканамічнай палітыкі дзяржаў - членаў Еўразійскага эканамічнага саюза на 2021-2022 гады". Гэта праграмны дакумент, які вызначае найбольш важныя для краін саюза каротка- і сярэднетэрміновыя задачы. Ён накіраваны на дасягненне мэт, устаноўленых асноўнымі напрамкамі эканамічнага развіцця ЕАЭС, і ўключае рэкамендацыі па вырашэнні гэтых задач.

Па прапанове беларускага боку на разгляд прадстаўлены праект рашэння Савета ЕЭК, які прадугледжвае прадаўжэнне да 30 чэрвеня 2022 года тэрміну дзеяння тарыфнай ільготы ў адносінах да тавараў, што ўвозяцца на мытную тэрыторыю ЕАЭС у мэтах рэалізацыі дзяржавамі-членамі мер па папярэджанні і прадухіленні распаўсюджвання каранавіруснай інфекцыі.

Таксама будуць разгледжаны пытанні аб унясенні змяненняў у тэхнічны рэгламент Мытнага саюза "Аб бяспецы абсталявання, якое працуе пад залішнім ціскам", аб адзіных механізмах крыптаграфічнай аховы пры маркіроўцы тавараў сродкамі ідэнтыфікацыі ў саюзе, аб мытна-тарыфным рэгуляванні (у адносінах да пруткоў з аптычнага шкла, белага цукру, крэмнію, тавараў, якія выкарыстоўваюцца пры вытворчасці сонечных батарэй).

версія для друку

зрабіць стартавай

дабавіць у выбранае