Бізнес-навіны

Першыя здзелкі заключаны на пляцоўцы імпартазамяшчэння БУТБ

Фота з архiва

30 мая, Мінск /Кар. БЕЛТА/. На распрацаванай Беларускай універсальнай таварнай біржай электроннай гандлёвай пляцоўцы па імпартазамяшчэнні ажыццёўлены першыя здзелкі, паведаміў карэспандэнту БЕЛТА прэс-сакратар БУТБ Раман Яніў.

Пляцоўка была ўведзена ў эксплуатацыю 27 мая, і ў той жа дзень айчынныя прадпрыемствы ўжо заключылі на ёй 166 здзелак на агульную суму Br545 тыс. Найбольшым попытам ва ўдзельнікаў таргоў карысталіся лакафарбавыя матэрыялы, бітумныя і тынкавальныя сумесі, герметыкі, вырабы са шкловалакна, пластмас і рызіны, а таксама помпавае абсталяванне, электраінструмент, электрашчыты і лічыльнікі электраэнергіі.

Як адзначылі ў прэс-службе БУТБ, цяпер на пляцоўцы прадстаўлены шырокі асартымент імпартазамяшчальнай прадукцыі, запатрабаванай на рынку Беларусі, а правесці закупку можна ў максімальна кароткія тэрміны. Гэтым і абумоўлены павышаны інтарэс да біржавой гандлёвай платформы.

"Цяпер у электронным каталогу даступны каля паўмільёна таварных пазіцый, і гэты пералік папаўняецца штодзённа. Прычым усё гэта актуальныя прапановы ад правераных біржай пастаўшчыкоў, якія гатовы аператыўна адгрузіць патрэбны тавар у неабходнай колькасці. Важнай асаблівасцю пляцоўкі з'яўляецца тое, што падбор прадукцыі, якая патрабуе імпартазамяшчэння, ажыццяўляецца ў аўтаматычным рэжыме, а каб імгненна атрымліваць паведамленні аб з'яўленні новых заявак на куплю або продаж, карыстальніку дастаткова пазначыць свой тэлефон або адрас электроннай пошты. Акрамя таго, для дадатковай абароны інтарэсаў прадаўцоў і пакупнікоў рэалізаваны механізм разлікаў па схеме "пастаўка супраць плацяжу", што зводзіць да мінімуму ўсе рызыкі, звязаныя з невыкананнем або нясвоечасовым выкананнем абавязацельстваў па здзелцы. Пры распрацоўцы пляцоўкі быў улічаны шматгадовы вопыт біржы ў сферы электроннай камерцыі і закупак, таму гэты інструмент будзе, безумоўна, карысны як дзяржаўным прадпрыемствам, так і прыватнаму бізнесу", - расказалі ў прэс-службе.

Зайсці на пляцоўку імпартазамяшчэння і азнаёміцца з размешчанымі там прапановамі можа любы карыстальнік без акрэдытацыі на БУТБ. Для гэтага патрэбны камп'ютар або любое мабільнае ўстройства з доступам у інтэрнэт. Аднак для ўдзелу ў таргах і ажыццяўлення здзелак трэба будзе атрымаць бясплатны электронны лічбавы подпіс і акрэдытавацца. Таргі на пляцоўцы праводзяцца кругласутачна.

ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з буйнейшых таварных біржаў ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае