Бізнес-навіны

Першы энергаблок БелАЭС уключаны ў сетку пасля замены абсталявання

19 лістапада, Мінск /Кар. БЕЛТА/. Першы энергаблок БелАЭС уключаны ў сетку, паведамілі БЕЛТА ў прэс-службе Міністэрства энергетыкі.

"Першы энергаблок Беларускай атамнай электрастанцыі ўключаны ў сетку пасля правядзення работ па замене трансфарматараў напружання ў вымяральных ланцугах генератарнага выключальніка, а таксама выпрабаванняў цеплаэнергетычнага абсталявання, неабходных вымярэнняў і даследаванняў", - паведамілі ў прэс-службе.

Уключэнне энергаблока ў сетку і набор нагрузкі праведзены ў адпаведнасці з патрабаваннямі тэхналагічнага рэгламенту бяспечнай эксплуатацыі без заўваг, праінфармавалі ў прэс-службе.

"Рэактар першага энергаблока цяпер працуе на магутнасці 40 працэнтаў ад намінальнай. Прадаўжаюцца выпрабаванні сістэм і абсталявання энергаблока", - адзначылі ў прэс-службе.

Згодна з графікам будаўніцтва БелАЭС, этап доследна-прамысловай эксплуатацыі першага энергаблока плануецца пачаць у снежні.

Беларуская АЭС з двума рэактарамі ВВЭР-1200 сумарнай магутнасцю 2400 МВт будуецца па расійскім праекце "АЭС-2006" паблізу Астраўца Гродзенскай вобласці. Генеральным падрадчыкам выступае інжынірынгавы дывізіён дзяржкарпарацыі "Расатам".

версія для друку

зрабіць стартавай

дабавіць у выбранае