Бізнес-навіны

Першая здзелка па закупцы ківі заключана на БУТБ

Фота з архiва

15 студзеня, Мінск /Кар. БЕЛТА/. На Беларускай універсальнай таварнай біржы зарэгістравана першая біржавая здзелка па закупцы свежых ківі аб'ёмам 40 т, паведамілі БЕЛТА ў прэс-службе БУТБ.

У таргах удзельнічалі 6 кампаній-пастаўшчыкоў, а пакупніком выступіла адно з вядучых айчынных прадпрыемстваў харчовай прамысловасці.

Як заявілі ў прэс-службе, здзелка з новым біржавым таварам стала вынікам планамернай работы па пашырэнні асартыменту плодаагародніннай прадукцыі, прадстаўленай на біржавы пляцоўцы. Раней прадпрыемствы харчовай галіны ўжо набывалі на БУТБ свежыя грушы, персікі, слівы, бульбу, моркву, часнок і цыбулю. Пры гэтым рэалізацыя гэтых таварных пазіцый ажыццяўляецца на сесійнай аснове, што дазваляе ўдзельнікам таргоў своечасова закрываць свае патрэбнасці ў сыравіне.

"Таргі плодаагародніннай прадукцыяй, бакалеяй і харчовай сыравінай уваходзяць у лік прыярытэтных напрамкаў развіцця біржавога гандлю ў сегменце АПК, паколькі закранаюць інтарэсы ўсіх вытворцаў прадуктаў харчавання ў краіне. У сувязі з гэтым асаблівая ўвага ў бягучым годзе будзе ўдзяляцца, па-першае, далейшаму пашырэнню таварнай наменклатуры, а па-другое, прыцягненню на біржавую платформу дадатковых удзельнікаў. У 2023 годзе біржавыя здзелкі па куплі і продажы агародніны, фруктаў, бакалеі і харчовай сыравіны рэгулярна ажыццяўлялі каля 170 суб'ектаў гаспадарання. Найбольшым попытам карысталіся комплексныя харчовыя дабаўкі, ізалят соевага бялку, пшанічная клейкавіна, ферментныя прэпараты, какава-парашок і ялавічны бялок. Удзельная вага гэтых таварных пазіцый у агульнай суме здзелак склала 59 працэнтаў. Што датычыцца непасрэдна плодаагародніннага напрамку, то лідарамі продажаў у мінулым годзе былі свежыя персікі, грушы і рэпчатая цыбуля", - расказалі на БУТБ.

Гандлёвыя сесіі па харчовай сыравіне, бакалеі і плодаагародніннай прадукцыі праводзяцца на БУТБ двойчы ў тыдзень. На таргах рэалізуюцца свежыя фрукты і агародніна, арэхі і сухафрукты, какава-парашок, цукровая пудра, крухмал, жэлацін, кандытарскі тлушч, цытрынавая кіслата, харчовая сода, квашанае сусла, спецыі, а таксама іншая сыравіна і дабаўкі, запатрабаваныя ў харчовай прамысловасці. Акрамя таго, пры наяўнасці заявак на куплю, раз у тыдзень арганізуюцца таргі з прадастаўленнем узораў прадукцыі.

версія для друку

зрабіць стартавай

дабавіць у выбранае