Бізнес-навіны

Пасол: узаемны гандаль паміж Беларуссю і КНР пастаянна расце

Фота з архiва

28 ліпеня, Мінск /Кар. БЕЛТА/. Старшыня Савета Рэспублікі Наталля Качанава правяла рабочую сустрэчу з Надзвычайным і Паўнамоцным Паслом Рэспублікі Беларусь у Кітайскай Народнай Рэспубліцы Юрыем Сянько. Аб гэтым БЕЛТА паведамілі ў прэс-службе верхняй палаты парламента.

Юрый Сянько па выніках рабочай сустрэчы з Наталляй Качанавай пракаменціраваў стан і перспектывы беларуска-кітайскага супрацоўніцтва.

"Рэспубліка Беларусь і Кітайская Народная Рэспубліка ўстанавілі вельмі цёплыя, добрыя партнёрскія адносіны. У верасні мінулага года ў Самаркандзе Прэзідэнт Беларусі Аляксандр Лукашэнка і старшыня Кітайскай Народнай Рэспублікі Сі Цзіньпін прынялі рашэнне аб павышэнні адносін паміж нашымі краінамі да ўзроўню ўсебаковага і ўсепагоднага стратэгічнага партнёрства. Гэта дало новы крок руху наперад нашым адносінам у эканоміцы, парламенцкай дзейнасці і ў многіх іншых сферах нашага двухбаковага ўзаемадзеяння", - сказаў ён.

Вельмі важным стала рашэнне кіраўнікоў нашых краін аб рэгіянальным супрацоўніцтве, адзначыў пасол. "Нашы рэгіёны - вобласці Рэспублікі Беларусь і правінцыі Кітайскай Народнай Рэспублікі - прадаўжаюць падпісваць двухбаковыя пагадненні аб партнёрскіх, пабрацімскіх адносінах. І ў развіццё такіх адносін падпісваюць праграмы двухбаковага ўзаемадзеяння, у якіх адлюстраваны розныя сферы дзейнасці: спорт, турызм, эканоміка, адукацыя, ахова здароўя і многае іншае, - падкрэсліў ён. - Уся гэта работа дае свае эфекты. Нават пандэмійныя гады не сталі выключэннем, узаемны гандаль паміж нашымі краінамі пастаянна расце. У 2022 годзе ў параўнанні з 2021-м мы з КНР павялічылі аб'ём экспарту беларускай прадукцыі на $700 млн - гэта добры вынік. 2023 год не з'яўляецца выключэннем. Вось ужо 5 месяцаў у параўнанні з 2022-м мы канстатуем 163-працэнтнае павелічэнне аб'ёму нашага беларускага экспарту ў КНР".

"Вельмі цеснае ўзаемадзеянне з Кітаем ідзе па лініі аховы здароўя, спорту, культуры, сельскай гаспадаркі, прамысловасці. Сёння ствараецца шэраг праектаў, якія дадуць у самай бліжэйшай перспектыве добрыя вынікі", - дадаў Юрый Сянько.

версія для друку

зрабіць стартавай

дабавіць у выбранае