Бізнес-навіны

5 кастрычніка, Ісламабад /Міхаіл Маціеўскі - БЕЛТА/. Пакістанская правінцыя Сінд закупіць самазвалы БелАЗ для распрацоўкі кар'ераў па здабычы вугалю. Аб гэтым паведаміў сёння журналістам генеральны дырэктар ААТ "БелАЗ" - кіруючая кампанія холдынга "БелАЗ-Холдынг" Пётр Пархомчык, перадае карэспандэнт БЕЛТА.

"Праведзены вельмі сур'ёзныя перагаворы з кіраўніцтвам правінцыі Сінд, дзе будзе распрацоўвацца адзін з буйнейшых кар'ераў па здабычы каменнага вугалю для цеплавых электрастанцый. Мы сёння падпісалі пагадненне, у рамках якога прадугледжваецца пастаўка кар'ерных самазвалаў. Першая партыя ў колькасці 18-20 штук пойдзе ў 2017 годзе", - расказаў Пётр Пархомчык.

Гендырэктар адзначыў, што развівацца кар'ер будзе вельмі хутка, прадугледжана больш як чатыры этапы. "Кожны этап будзе патрабаваць амаль 20-30 самазвалаў", - звярнуў увагу ён.

Пётр Пархомчык таксама дадаў, што пакістанскі бок зацікаўлены закупляць не толькі самазвалы, але і іншую тэхніку, у тым ліку пагрузчыкі, бульдозеры і экскаватары.