Бізнес-навіны

Інтарэс каласальны. Лукашэнка арыентаваў на ўзмацненне супрацоўніцтва з Расіяй у мікраэлектроніцы

14 чэрвеня, Мінск /Кар. БЕЛТА/. У развіцці сферы мікраэлектронікі нельга замыкацца ў нацыянальных граніцах - работу неабходна весці ў цесным супрацоўніцтве з Расіяй. Аб гэтым Прэзідэнт Беларусі Аляксандр Лукашэнка заявіў на нарадзе аб стане і развіцці мікраэлектронікі, перадае карэспандэнт БЕЛТА.

"Нельга замыкацца ў нацыянальных граніцах. Гэта не дасць патрэбнага эфекту, - падкрэсліў беларускі лідар, гаворачы аб перспектывах развіцця мікраэлектронікі. - Трэба супрацоўнічаць не толькі там, дзе нас чакаюць з распасцёртымі рукамі, дапусцім, у Расіі, але і там, дзе нас не чакаюць, - з амерыканцамі, японцамі і гэтак далей. Хаця б для таго, каб бачыць той найвышэйшы ўзровень, да якога мы імкнёмся".

"Работу неабходна, вядома ж, весці ў цесным супрацоўніцтве з Расіяй. Мы не ўтойваем наш інтарэс у гэтым плане. Таму што рэалізаваць усе напрацоўкі, якія ў нас ёсць, - навуковыя, доследна-канструктарскія - можна толькі дзякуючы своечасоваму фінансаванню. Расія гатова фінансаваць нас у гэтым плане. Прынамсі, мы з Прэзідэнтам Пуціным аб гэтым шмат разоў гаварылі і прыйшлі адназначна на гэтай высновы". Як адзначыў кіраўнік беларускай дзяржавы, займацца гэтым пытаннем даручана расійскаму віцэ-прэм'еру Юрыю Барысаву.

"Узровень інтарэсу каласальны, - прадоўжыў кіраўнік дзяржавы. - Сёння ўжо нікога не трэба пераконваць у неабходнасці цеснай кааперацыі, як гэта было раней, калі размова ішла аб энергетыцы, сельгасмашынабудаванні, вытворчасці аўтакампанентаў".

Аляксандр Лукашэнка выказаў меркаванне, што для каардынацыі сумеснай работы спатрэбіцца пастаянна функцыянуючы беларуска-расійскі орган. Ён таксама згадаў аб існаванні прапановы па стварэнні нейкага беларуска-расійскага міністэрства ў гэтай сферы. "Калі мы створым нейкую структуру над нашымі міністэрствамі, гэта праблемы не вырашыць, проста будзем траціць грошы. Таму трэба сур'ёзна падумаць над каардынацыяй нашай работы і хто будзе ёю займацца", - дадаў Прэзідэнт.

"Цяпер для вас, галіны мікраэлектронікі, як і для іншых галін, - шанц. Адкрыта кажу: мы вельмі запатрабаваны. Запатрабаваны перш за ўсё ў нашай брацкай Расіі. І ў Беларусі, няхай і няшмат, але вы вырабляеце для беларускага рынку ўсё неабходнае, дапусцім, для тэхнікі (аўтамабілі, трактары і гэтак далей), - падкрэсліў Аляксандр Лукашэнка. - Пад гэта выдзяляецца, перш за ўсё, Расіяй вялікае фінансаванне. Працуйце. Вазьміце гэтыя грошы і вырабіце канкурэнтаздольны тавар".

версія для друку

зрабіць стартавай

дабавіць у выбранае