Бізнес-навіны

Інфасістэма для ядзернай бяспекі і ПЗ для энергетыкі: якія распрацоўкі прадстаўлены на EnergyExpo

Фота з архiва

11 кастрычніка, Мінск /Кар. БЕЛТА/. Больш за 100 распрацовак прадстаўлены на XXVI Міжнароднай спецыялізаванай выстаўцы "Энергетыка. Экалогія. Энергазберажэнне. Электра" (EnergyExpo) у калектыўным раздзеле, арганізатарам якога выступае Дзяржаўны камітэт па навуцы і тэхналогіях, паведамілі карэспандэнту БЕЛТА ў прэс-службе ДКНТ.

"Увазе ўдзельнікаў Беларускага энергетычнага і экалагічнага форуму і наведвальнікаў выстаўкі прадстаўлена 115 навукова-тэхнічных распрацовак арганізацый Міністэрства адукацыі, Нацыянальнай акадэміі навук Беларусі, Нацыянальнага цэнтра інтэлектуальнай уласнасці і іншых устаноў", - расказалі ў прэс-службе.

У ліку перадавых распрацовак - інтэлектуальная інфармацыйная сістэма для забеспячэння кантролю (нагляду) у галіне ядзернай і радыяцыйнай бяспекі eLab-Control. Цяпер з дапамогай гэтай сістэмы ў Беларусі на ўзроўні рэгулюючага органа (Дзяржатамнагляду) вядзецца ўвесь улік крыніц іанізуючага выпрамянення, канфігурацыі сетак, сеткавай інфраструктуры, бяспекі кліенцкіх рабочых месцаў, бяспекі сервера і баз даных, ядзернага матэрыялу са справаздачнасцю перад МАГАТЭ, нагляд за будаўніцтвам, уводам у эксплуатацыю і функцыянаваннем Беларускай атамнай станцыі. У склад сістэмы ўваходзяць модулі кантролю (нагляду) за забеспячэннем бяспекі пры будаўніцтве і ўводзе ў эксплуатацыю Беларускай АЭС, за радыяцыйнай бяспекай крыніц іанізуючага выпрамянення, а таксама модуль уліку і кантролю ядзерных матэрыялаў, радыеактыўных адкідаў і адпрацаванага ядзернага матэрыялу.

Таксама на выстаўцы прадстаўлена метадычнае і праграмнае забеспячэнне для аналізу і прыняцця рашэнняў пры фарміраванні рэжымаў спажывання газу ў рэгіянальных сістэмах газазабеспячэння. Так, распрацаваны матэматычныя мадэлі ўзаемасувязі сутачнага расходу газу ад тэмпературы паветра, вызначаны сезонныя каэфіцыенты і ўмоўна-пастаянная расходу газу, якая не залежыць ад змены сярэднясутачнай тэмпературы паветра. Перавага і эканамічная эфектыўнасць заключаецца ў мінімізацыі памылкі пры фарміраванні заявак на пастаўку газу па рэгіянальных сістэмах газазабеспячэння і ў цэлым па Беларусі.

Акрамя таго, на выстаўцы прэзентаваны актыўныя слаі для сонечных элементаў і трэкер прасторавай арыентацыі сонечнай панэлі ў адпаведнасці з бягучым становішчам Сонца. Таксама прадстаўлены тэхналогіі атрымання матэрыялаў будаўнічага і машынабудаўнічага прызначэння з выкарыстаннем тэкстыльных адходаў.

Сярод іншых распрацовак святлодыёдная свяцільня, якая прызначана для стварэння энергаэфектыўнага штучнага асвятлення ў культывацыйных збудаваннях закрытага грунту (цяпліцах, фітатронах і да т.п.).

Беларускі энергетычны і экалагічны форум Energy Expo праходзіць у Мінску з 11 па 14 кастрычніка.

версія для друку

зрабіць стартавай

дабавіць у выбранае