Бізнес-навіны

14 снежня, Мінск /Юлія Огнева - БЕЛТА/. Беларусь актыўна працуе над папулярызацыяй айчынных тавараў на вялікіх кітайскіх інтэрнэт-пляцоўках. Аб гэтым заявіла сёння журналістам намеснік міністра гандлю Ірына Наркевіч, перадае карэспандэнт БЕЛТА.

"Частка тавараў "Беллегпрама" прасоўваецца ўжо цераз пляцоўкі "Алібаба" і "Аліэкспрэс". У Кітай ездзіла дэлегацыя Беларускай універсальнай таварнай біржы. Тэхналагічна пляцоўка ў іх ёсць, і мы цяпер прапрацоўваем гэта пытанне. Ёсць дамоўленасці з вялікімі кітайскімі пляцоўкамі, каб яны прыехалі да нас з мэтай прасоўвання нашых тавараў. Мы ў гэтым зацікаўлены. І, дарэчы, яны ў гэтым зацікаўлены, таму што пасля пэўнага часу актыўнай экспансіі кітайскіх тавараў на сусветныя рынкі яны зацікаўлены ў якасным замежным тавары сярэдняга цэнавага сегмента. Наш тавар такім і з'яўляецца", - адзначыла Ірына Наркевіч.

Актыўнае пашырэнне беларускіх тавараў на электронных гандлёвых пляцоўках Кітая прадугледжана Дырэктывай нумар 5 "Аб развіцці двухбаковых адносін Рэспублікі Беларусь з Кітайскай Народнай Рэспублікай". Дакументам вызначаны асноўныя напрамкі супрацоўніцтва з Кітаем: глыбокая і ўзаемная інтэграцыя галін і прадпрыемстваў; інфармацыйна-камунікацыйныя тэхналогіі; фарміраванне сумесных даследчых і навукова-практычных цэнтраў, сумеснае развіццё галіновай навукі; прамое і сістэмнае міжрэгіянальнае супрацоўніцтва; стварэнне ў Беларусі рэгіянальнага цэнтра развіцця кітаязнаўства і ўзаемадзеяння з Кітаем.