Бізнес-навіны

23 лютага, Мінск /Кар. БЕЛТА/. Нацыянальная акадэмія навук Беларусі прапануе Пакістану дзевяць сумесных праектаў у сферы АПК, паведамілі БЕЛТА ў прэс-службе НАН Беларусі.

"У чацвер, 23 лютага, адбыліся перагаворы кіраўніцтва Акадэміі навук Беларусі з дэлегацыяй Міністэрства нацыянальнай харчовай бяспекі і даследаванняў Пакістана на чале з першым намеснікам міністра, сустаршынёй сумеснай рабочай групы Абідам Джаведам. Акадэмія навук надае асаблівае значэнне развіццю ўзаемавыгаднага супрацоўніцтва з Пакістанам - НАН Беларусі ўжо распрацавала комплекс мер па развіцці супрацоўніцтва з арганізацыямі гэтай краіны на 2016-2020 гады. У яго ўключаны дзевяць праектаў, запланаваных да рэалізацыі сумесна з Пакістанскім саветам сельскагаспадарчых даследаванняў. Мы гатовы да таго, каб гэтыя праекты былі рэалізаваны ў бліжэйшы час", - падкрэслілі ў прэс-службе.

У НАН расказалі, што сярод прапанаваных праектаў - абмен генетычнымі рэсурсамі пладовых і ягадных культур і тэхналогіямі мінімізацыі страт ураджаю, глыбокай перапрацоўкі прадукцыі мяса-малочнай прамысловасці. "Акрамя таго, Навукова-практычны цэнтр НАН Беларусі па механізацыі сельскай гаспадаркі гатовы разгледзець пытанні арганізацыі пастаўкі ў Пакістан запатрабаваных відаў сельскагаспадарчых машын, а таксама распрацаваць сістэму машын для інавацыйных тэхналогій вытворчасці сельскагаспадарчай прадукцыі з улікам глебава-кліматычных умоў Пакістана", - растлумачылі ў прэс-службе.

Першы намеснік міністра нацыянальнай харчовай бяспекі і даследаванняў Пакістана Абід Джавед адзначыў, што Пакістан сёння зацікаўлены ў сельскагаспадарчым супрацоўніцтве, накіраваным на стварэнне сумесных прадпрыемстваў па вытворчасці мясной, малочнай прадукцыі з выкарыстаннем беларускіх тэхналогій.

У НАН таксама адзначылі, што сёння члены дэлегацыі азнаёміліся з дзейнасцю навукова-практычных цэнтраў аддзялення аграрных навук Акадэміі, што дапаможа выпрацоўцы больш канкрэтных прапаноў па далейшым супрацоўніцтве.

НАН Беларусі ўжо накіравала прапановы аб супрацоўніцтве па навуковых праектах. У бягучым годзе плануецца дэталёвае абмеркаванне гэтых прапаноў, магчымасцей фінансавання і назначэнне адказных за выкананне будучых праектаў.