Бізнес-навіны
МЗС заклікае беларускія прадпрыемствы актыўней абараняць унутраны рынак і адстойваць інтарэсы на знешніх
9 лістапада, Мінск /Кар. БЕЛТА/. У беларускіх прадпрыемстваў істотна ўзрасла патрэбнасць у выкарыстанні інструментаў абароны ўласнага рынку. Аб гэтым заявіў намеснік міністра замежных спраў Беларусі Ігар Назарук на практыка-арыентаваным семінары для беларускіх прадпрыемстваў па прымяненні мер абароны ўнутранага рынку і мер мытна-тарыфнага рэгулявання ў Еўразійскім эканамічным саюзе, перадае карэспандэнт БЕЛТА.
Намеснік міністра адзначыў, што ва ўмовах, калі трэба знаходзіць новыя рынкі збыту, выходзіць на новыя краіны і заваёўваць дадатковыя нішы, беларускія прадпрыемствы сутыкаюцца з агрэсіўнымі паводзінамі сваіх канкурэнтаў.
"Апошнім часам мы атрымліваем сігналы аб усё большай канкурэнцыі з боку вытворцаў канкрэтных рэгіёнаў. Гэта датычыцца і машынабудаўнічага комплексу, і бытавой тэхнікі, шкловалакна, іншых тавараў. Паўстае пытанне, як выкарыстоўваць дазволены, легітымны інструментарый у пераадоленні гэтых перашкод, як абараняць свой рынак з улікам удзелу Беларусі ў наднацыянальнай структуры (ЕАЭС. - Заўвага БЕЛТА). Калі гаварыць пра абаронныя расследаванні, то адносна імпарту з трэціх краін, нягледзячы на дэкларуемую зацікаўленасць нашых вытворцаў, рашучых крокаў у гэтым напрамку мы пакуль не праяўляем. Мы - гэта ў цэлым Беларусь", - сказаў Ігар Назарук.
Але так было не заўсёды, заўважыў прадстаўнік знешнепалітычнага ведамства. Да 2011 года правядзенне расследаванняў знаходзілася ў нацыянальнай кампетэнцыі, а дакладней - у кампетэнцыі МЗС.
З 2001 па 2010 год беларускія прадпрыемствы сумесна з Міністэрствам замежных спраў ініцыявалі 15 абаронных расследаванняў, у тым ліку 10 спецабаронных і 5 антыдэмпінгавых. Па выніках гэтых расследаванняў было ўведзена 5 абаронных мер, у тым ліку 4 спецабаронныя і адна антыдэмпінгавая пошліна.
Аднак пасля 2011 года, калі правядзенне расследаванняў было перададзена ў наднацыянальную кампетэнцыю, гэта значыць у Еўразійскую эканамічную камісію, беларускімі прадпрыемствамі не было ініцыявана ні аднаго расследавання. Пры гэтым беларускія вытворцы даволі ахвотна далучаюцца да расследаванняў, якія ініцыююць вытворцы з іншых краін ЕАЭС.
На думку Ігара Назарука, з аднаго боку, гэта можна растлумачыць тым, што для ініцыявання расследавання неабходна выканаць патрабаванне аб долі вытворчасці. Так, заяўнік і вытворцы ЕАЭС, якія выказаліся ў падтрымку заявы, павінны вырабляць не менш як 25 працэнтаў ад усяго аб'ёму вытворчасці на тэрыторыі саюза. Але, з другога боку, нават калі беларускія таваравытворцы заведама праінфармаваны, што ў выпадку падачы заявы іх падтрымаюць вытворцы з іншых дзяржаў ЕАЭС, яны ўсё роўна не адважваюцца на самастойную падрыхтоўку заявы.
"Вельмі многія замежныя прадпрыемствы звяртаюцца да дэмпінгу. У іх мэта - карысць, заваяванне рынку, выцясненне канкурэнтаў, вытворцаў у краіне і далей дамінаваць на гэтым рынку. Яны прадаюць тавар па кошце, які ніжэйшы за затраты на вытворчасць і яго транспарціроўку. Прадпрыемства ідзе на такія выдаткі, разумеючы, што далей, заваяваўшы гэты рынак, яны паступова або рэзка павысяць кошт свайго тавару або паслугі, адпрацуюць выдаткі і далей будуць працаваць з прыбыткам. А для прадпрыемства, якое ўступіла ў канкурэнцыю з іншаземцам, надыходзяць няпростыя часы. Мы будзем падказваць нашым прадпрыемствам, як дзейнічаць у новых няпростых умовах", - растлумачыў журналістам значнасць тэмы прадстаўнік знешнепалітычнага ведамства.
Семінар арганізаваны Міністэрствам замежных спраў Беларусі сумесна з Еўразійскай эканамічнай камісіяй на базе прадпрыемства "Атлант". Яго ўдзельнікамі сталі прадстаўнікі больш як 70 беларускіх прадпрыемстваў і арганізацый. У мінулым годзе падобнае мерапрыемства было арганізавана ў фармаце відэасувязі.
У час семінара беларускім таваравытворцам раскажуць пра асаблівасці падрыхтоўкі ініцыятыўных прапаноў у сферы мытна-тарыфнага рэгулявання і заяў аб правядзенні абаронных расследаванняў. На мерапрыемстве таксама будуць разгледжаны пытанні часовага зніжэння ставак увазных мытных пошлін Адзінага мытнага тарыфу і прымянення тарыфных ільгот для патаннення кошту сыравіны, якая не вырабляецца ў ЕАЭС і належыць да катэгорыі тавараў крытычнага імпарту.
версія для друку
зрабіць стартавай
дабавіць у выбранае