Бізнес-навіны

Міхадзюк: набор персаналу на БелАЭС будзе практычна завершаны ў I квартале 2020 года

17 верасня, Вена /Кар. БЕЛТА/. Набор персаналу на Беларускую АЭС будзе практычна завершаны ў першым квартале 2020 года. Аб гэтым паведаміў намеснік міністра энергетыкі Беларусі Міхаіл Міхадзюк на сустрэчы з дэлегацыяй Еўрапейскай камісіі на чале з выконваючым абавязкі намесніка генеральнага дырэктара па каардынацыі пытанняў ядзернай энергетыкі Генеральнага дырэктарата па энергетыцы Еўракамісіі Масіма Карыба, перадае карэспандэнт БЕЛТА.

На сустрэчы абмяркоўваліся пытанні адносна рэалізацыі праекта па будаўніцтве БелАЭС. У прыватнасці, прадстаўнікі Еўракамісіі пацікавіліся, ці дастаткова персаналу для камплектацыі атамнай станцыі.

"Першы энергаблок поўнасцю ўкамплектаваны. Што датычыцца другога блока, то персанал на ключавыя пасады падабраны і праходзіць навучанне. У нас ёсць праграма набору па тых спецыяльнасцях, якія не патрабуюць працяглай падрыхтоўкі, і ў першым квартале 2020 года мы практычна завершым набор персаналу на станцыю", - расказаў Міхаіл Міхадзюк. Работнікі праходзяць падрыхтоўку ў тым ліку на поўнамаштабным трэнажоры, які паўтарае рэальныя рабочыя сітуацыі на станцыі.

Размова таксама ішла пра работу нядаўніх місій МАГАТЭ ў Беларусі. За апошні год прыняты тры ацэначныя місіі МАГАТЭ - місія EPREV па ацэнцы гатоўнасці да рэагавання на ядзерныя і радыяцыйныя аварыйныя сітуацыі, місія ISSAS па пытаннях уліку і кантролю ядзерных матэрыялаў і місія pre-OSART па папярэдняй ацэнцы эксплуатацыйнай бяспекі будуемай АЭС. У першым квартале 2020 года чакаецца місія INIR па комплекснай ацэнцы інфраструктуры ядзернай энергетыкі.

Міхаіл Міхадзюк адзначыў, што па выніках апошняй місіі - pre-OSART - эксперты далі пэўныя рэкамендацыі і выдзелілі добрыя практыкі Беларусі, якія могуць быць укаранёны ў іншых краінах. "Цяпер рыхтуем план мерапрыемстваў па выкананні рэкамендацый. Гэта звычайная работа па выніках любой місіі", - сказаў намеснік міністра.

Ён праінфармаваў прадстаўнікоў Еўракамісіі аб бягучых работах на пляцоўцы БелАЭС. На першым блоку ідуць перадпускавыя аперацыі, праведзены гідраўлічныя выпрабаванні абсталявання першага і другога контураў. На другім блоку завяршаюцца будаўнічыя работы, вядзецца мантаж абсталявання.

На сустрэчы таксама закраналіся тэмы дастаўкі на пляцоўку АЭС ядзернага паліва, выдачы ліцэнзіі на эксплуатацыю станцыі.

версія для друку

зрабіць стартавай

дабавіць у выбранае