Бізнес-навіны

Мінэканомікі і ЕАБР абмеркавалі супрацоўніцтва ў рэалізацыі інфраструктурнага плана Беларусі да 2025 года

10 снежня, Мінск /Кар. БЕЛТА/. Магчымасці супрацоўніцтва ў рамках Нацыянальнага інфраструктурнага плана Беларусі на 2021-2025 гады, які распрацоўваецца, абмяркоўваліся на сустрэчы міністра эканомікі Беларусі Аляксандра Чарвякова са старшынёй праўлення Еўразійскага банка развіцця (ЕАБР) Мікалаем Падгузавым, паведамілі БЕЛТА ў прэс-службе Мінэканомікі.

"Удзельнікі абмеркавалі перспектывы фінансавання інфраструктурных і інвестыцыйных праектаў у Рэспубліцы Беларусь з прыцягненнем рэсурсаў ЕАБР. Бакі адзначылі ўзаемную зацікаўленасць у рэалізацыі праектаў з высокім інтэграцыйным эфектам", - расказалі ў прэс-службе.

Акрамя таго, міністр эканомікі адзначыў значнасць падтрымкі ЕАБР кліентам у Беларусі для падтрымання ўстойлівасці іх фінансавага стану ва ўмовах нявызначанасці, выкліканай пандэміяй каранавіруса.

Еўразійскі банк развіцця заснаваны ў 2006 годзе для садзейнічання развіццю рыначнай эканомікі дзяржаў-удзельніц, іх устойліваму эканамічнаму росту і пашырэнню ўзаемных гандлёва-эканамічных сувязей. Статутны капітал ЕАБР складае $7 млрд. Дзяржавамі - удзельніцамі банка з'яўляюцца Беларусь, Арменія, Казахстан, Кыргызстан, Расія і Таджыкістан.

На 1 снежня 2020 года доля Беларусі ў бягучым інвестыцыйным партфелі ЕАБР складае $988,9 млн. За 2 гады яна павялічылася з 9,2 працэнта ў снежні 2018 года да 25,3 працэнта ў снежні бягучага года, гэта значыць у 2,75 раза.

версія для друку

зрабіць стартавай

дабавіць у выбранае