Бізнес-навіны

Машынабудаванне, дарожная карта, адкрыццё пасольстваў. Мінск і Малаба вызначылі перспектывы супрацоўніцтва

19 кастрычніка, Мінск /Кар. БЕЛТА/. Беларусь і Экватарыяльная Гвінея дамовіліся аб усебаковым развіцці ўзаемадзеяння. Аб гэтым паведаміў журналістам міністр замежных спраў Сяргей Алейнік па выніках праведзенага ў Мінску першага пасяджэння сумеснай камісіі па гандлёва-эканамічным супрацоўніцтве паміж урадам Рэспублікі Беларусь і ўрадам Рэспублікі Экватарыяльная Гвінея, перадае карэспандэнт БЕЛТА.

Ён звярнуў увагу, што беларускае машынабудаванне гатова і можа ўнесці пазітыўны ўклад у працэс механізацыі экватагвінейскага аграрнага сектара.

"Мы прапрацоўваем таксама пастаўкі грузавой, пасажырскай, прычапной, спецыяльнай тэхнікі, нашых кар'ерных самазвалаў для патрэб эканомікі Экватарыяльнай Гвінеі, якая пастаянна расце, - сказаў Сяргей Алейнік. - За апошнія 25 гадоў ВУП гэтай краіны павялічыўся ў больш як 52 разы. Краіна займае адно з вядучых месцаў у Афрыцы па ВУП на душу насельніцтва. Упэўнены, што беларускія тэхналогіі і кампетэнцыі могуць унесці пазітыўны ўклад у падтрыманне і прымнажэнне тэмпаў эканамічных вынікаў нашых партнёраў. Стаіць задача перавесці эканоміку з сыравіннага сектара на больш высокатэхналагічны і навукаёмісты інавацыйны шлях развіцця. І мы ў гэтым плане можам сур'ёзна дапамагчы нашым сябрам".

"Нам ёсць што прапанаваць і ў сферы аховы здароўя. Літаральна ў бліжэйшы час плануем стварыць на базе адной з медыцынскіх ВНУ Беларусі навучальны цэнтр для падрыхтоўкі студэнтаў з Экватарыяльнай Гвінеі і іншых краін Афрыкі, павышэння кваліфікацыі ўрачоў. У якасці аднаго з новых напрамкаў - узаемадзеянне ў сферы лясной гаспадаркі і аховы навакольнага асяроддзя", - адзначыў кіраўнік МЗС.

"Нашы краіны ўзаемна настроены на доўгатэрміновае супрацоўніцтва, таму мы вядзём размову не проста аб нарошчванні тавараабароту, але і аб комплексных кааперацыйных праектах у розных сектарах, - прадоўжыў міністр. - Менавіта таму мы дамовіліся распрацаваць і прыняць дарожную карту нашага супрацоўніцтва да 2030 года".

Ён таксама звярнуў увагу, што для хутчэйшага дасягнення вынікаў у кожнай з галін вырашана стварыць у рамках камісіі шэраг падкамісій і рабочых груп.

"Вядома, для забеспячэння такога аб'ёму работы ў нас ёсць планы. І мы плануем завяршыць працэдуры па адкрыцці нашага пасольства ў Экватарыяльнай Гвінеі і, як я зразумеў з перагавораў са сваім калегам, Экватарыяльная Гвінея плануе таксама адкрыць сваё пасольства ў Рэспубліцы Беларусь", - падкрэсліў Сяргей Алейнік.

"Мы таксама адзіныя ў думцы, што рух наперад немагчымы без актыўнага ўзаемадзеяння дзелавых колаў. Таму ў працэсе работы актыўна працавалі гандлёва-прамысловыя палаты. Мы дамовіліся аб правядзенні бізнес-форумаў", - звярнуў увагу ён.

Акрамя таго, намечаны планы па пашырэнні дагаворна-прававой базы і падпісанні новых двухбаковых пагадненняў.

Сяргей Алейнік упэўнены, што ўсе гэтыя крокі паўплываюць на ўзаемную эканамічную актыўнасць і дадуць магчымасць выйсці на тавараабарот $100 млн да 2030 года. У стратэгічным плане ёсць перспектывы стварэння ў Экватарыяльнай Гвінеі вытворча-лагістычнага хаба беларускай прадукцыі, які будзе выкарыстоўвацца не толькі для паставак нашай прадукцыі ў гэту краіну, але і ў краіны Цэнтральнай і Заходняй Афрыкі.

"Экватарыяльная Гвінея ўваходзіць у Афрыканскую кантынентальную зону свабоднага гандлю, якая аб'ядноўвае 54 дзяржавы, а таксама ў Эканамічнае супольніцтва дзяржаў Цэнтральнай Афрыкі, у якое ўваходзіць 11 дзяржаў. Гэта адкрывае дадатковыя перспектывы для работы на рынках афрыканскіх дзяржаў. І Беларусь, са свайго боку, прапанавала для Экватарыяльнай Гвінеі стаць правадніком для яе прадукцыі на рынкі ЕАЭС. Цвёрда ўпэўнены, што фундамент адносін, які мы ствараем, дасць магчымасць нам у самы бліжэйшы час рэалізаваць праекты двухбаковага супрацоўніцтва", - рэзюмаваў кіраўнік беларускага МЗС.

версія для друку

зрабіць стартавай

дабавіць у выбранае