Бізнес-навіны

Машынабудаванне і нафтахімія: Мінэканомікі аб планах па імпартазамяшчэнні ва ўмовах санкцый

Фота з архiва

16 мая, Мінск /Кар. БЕЛТА/. Першы намеснік міністра эканомікі Беларусі Юрый Чабатар расказаў сёння журналістам аб планах па імпартазамяшчэнні ва ўмовах санкцый, перадае карэспандэнт БЕЛТА.

"Імпартазамяшчэнне сёння актуальная тэма і ў нас, і ў нашых расійскіх партнёраў. Закрыццё асобных рынкаў, магчымасці куплі той ці іншай сыравіны і матэрыялаў істотна паўплывалі на некаторыя прадпрыемствы. Мы пачалі работу комплексна - прааналізавалі імпарт у Беларусь і РФ, каб убачыць патэнцыяльныя ёмістыя пазіцыі, якія ёсць магчымасць асвоіць нашым прадпрыемствам. Разам з расійскімі калегамі стварылі рабочыя групы па розных сектарах: аўтамабілебудаванне, ліфтабудаванне, сельгасмашынабудаванне і гэтак далей. Стаяла задача адпрацаваць кампетэнцыі і вызначыць, на якіх прадпрыемствах можна вырабляць запатрабаваную прадукцыю для патрэб дзвюх краін", - сказаў Юрый Чабатар.

За апошнія паўтара месяца бакі выпрацавалі прапановы па інвестыцыйных праектах. "Гэта і кампаненты для сельгасмашынабудавання, вузлы і агрэгаты для аўтамабілебудавання. У нафтахімічным комплексе неабходна тэрэфталевая кіслата, каб вырабляць хімічныя валокны, якія запатрабаваны ў лёгкай прамысловасці", - адзначыў першы намеснік міністра. Сярод іншых напрамкаў - прыборабудаванне, дрэваапрацоўка.

Задзейнічаны патэнцыял Нацыянальнай акадэміі навук разам з Дзяржаўным камітэтам па навуцы і тэхналогіях і галіновымі ведамствамі. "Мы падрыхтавалі прыкладны пералік - каля 30 пазіцый - на базе ўжо існуючых распрацовак нашых навуковых дзеячаў, каб асвоіць на прадпрыемствах пад патрэбнасці імпартазамяшчэння. Як для буйных прадпрыемстваў машынабудавання, так і для сярэдніх. Напрыклад, запатрабаваны лакафарбавыя матэрыялы з асаблівымі характарыстыкамі, антыкаразійныя матэрыялы. Парашковая металургія стала запатрабаванай, шэраг распрацовак будзе асвоены на нашых прадпрыемствах", - звярнуў увагу Юрый Чабатар.

Што датычыцца сумесных з РФ імпартазамяшчальных праектаў, яны будуць рэалізаваны па самых актуальных пазіцыях для двух рынкаў. "Цана пытання - амаль $2,5 млрд у плане інвестыцыйных укладанняў. Праекты цяжкавагавыя, будуць рэалізоўвацца год, два, тры, але дадуць сінергетычны эфект і для іншых галін. Напрыклад, праект па дакладным ліцці патрэбны ўсім машынабудаўнікам як у нас, так і ў Расіі", - падкрэсліў першы намеснік міністра.

"Што датычыцца крыніц фінансавання, то мы бачым магчымасць сумесна з расійскімі калегамі фінансаваць такія распрацоўкі і ўкараняць у нашы прамысловыя комплексы. Таксама мы працуем з банкаўскімі структурамі ўнутры краіны па стварэнні спецыяльнага прадукту для вытворцаў імпартазамяшчальнай прадукцыі - ільготнага крэдыту як для малога бізнесу, так і для буйнога", - дадаў прадстаўнік Мінэканомікі.

версія для друку

зрабіць стартавай

дабавіць у выбранае