Бізнес-навіны

Лукашэнка разлічвае на прадаўжэнне супрацоўніцтва з Citic Construction, асабліва ў будаўніцтве

22 верасня, Мінск /Кар. БЕЛТА/. Прэзідэнт Беларусі Аляксандр Лукашэнка разлічвае на прадаўжэнне супрацоўніцтва з кітайскай карпарацыяй Citic Construction, асабліва ў будаўніцтве. Аб гэтым кіраўнік дзяржавы заявіў на сустрэчы з першым віцэ-прэзідэнтам карпарацыі Ян Цзяньцянам, перадае карэспандэнт БЕЛТА.

Беларускі лідар адзначыў, што ў будучым плануе абмеркаваць шэраг пытанняў са Старшынёй КНР Сі Цзіньпінам, і да гэтага хацеў бы высветліць асобныя моманты па рабоце Citic Construction у Беларусі.

"Ёсць шэраг пытанняў, якія мы павінны з вамі абмеркаваць, таму што вы - буйнейшая кампанія, якая працуе ў Беларусі. Усё гэта звязана з тым, што мне трэба грунтоўна падрыхтавацца да размовы зусім хутка, як дамовіліся, са Старшынёй Сі Цзіньпінам, - растлумачыў Аляксандр Лукашэнка.- Мы правялі грунтоўную і змястоўную сустрэчу на зямлі Самарканда (у час саміту ШАС. - Заўвага БЕЛТА) са Старшынёй (КНР Сі Цзіньпінам. - Заўвага БЕЛТА), абмеркавалі ўсе эканамічныя пытанні нашага ўзаемадзеяння, у тым ліку і пытанні, якія ўваходзяць у сферу вашай кампетэнцыі і адказнасці, і дамовіліся, што пасля 20-га з'езда КПК мы больш грунтоўна ў рабочым рэжыме пагаворым і аб эканоміцы, і аб палітыцы, і аб ваенна-тэхнічным супрацоўніцтве".

"Я вельмі спадзяюся, што гэты ваш візіт не проста праясніць сітуацыю па некаторых праектах і мы зможам абгаварыць тэрміны завяршэння гэтых праектаў, але і ваш візіт дасць магчымасць зазірнуць у будучыню нашых адносін, асабліва ў будаўнічай галіне", - дадаў кіраўнік дзяржавы. Паводле яго слоў, Citic Construction выказвае гатоўнасць працаваць у Беларусі і будаваць па самых сучасных тэхналогіях шэраг прадпрыемстваў. "Мы гэта вітаем", - падкрэсліў Прэзідэнт.

У час сустрэчы бакі абмеркавалі некаторыя сумесныя праекты на перспектыву. У прыватнасці, размова ішла аб будаўніцтве азотнага комплексу, цэха па вытворчасці паперы на Светлагорскім ЦКК, а таксама арганізацыі глыбокай перапрацоўкі прадукцыі аграпрамысловага комплексу. Што датычыцца апошняга, то з боку кітайскіх партнёраў ёсць сур'ёзная зацікаўленасць у стварэнні такой вытворчасці з мэтай далейшага экспарту прадукцыі на рынак Кітая. Кіраўнік дзяржавы гэту ініцыятыву падтрымаў і даў даручэнне адказным службовым асобам аказаць садзейнічанне ў яе рэалізацыі.

Праект па будаўніцтве азотнага комплексу ў Беларусі прадугледжвае стварэнне сучасных вытворчасцей аміяку магутнасцю 920 тыс. т у год і карбаміду магутнасцю 1,29 млн т у год. Для прыняцця рашэння па яго будаўніцтве арганізаваны візіт айчынных спецыялістаў у КНР, цяпер яны знаходзяцца на дзеючых вытворчасцях аміяку і карбаміду, каб у далейшым даць дакладны адказ, ці магчыма будаўніцтва і эксплуатацыя аналагічных аб'ектаў у Беларусі з улікам прымальнасці вытворчых магутнасцей, захавання экалагічных патрабаванняў, эканамічнай эфектыўнасці і г.д.

На Светлагорскім ЦКК працягваецца рэалізацыя праекта па будаўніцтве вытворчасці паперы. У поўным аб'ёме ўжо выкананы работы ў рамках першай чаргі (завершана інжынерная падрыхтоўка будаўнічай пляцоўкі). Другая чарга прадугледжвае пастаўку абсталявання, будаўніча-мантажныя і пусканаладачныя работы. Цяпер Светлагорскі ЦКК і кітайская кампанія прадаўжаюць работу над праектамі кантрактаў на пастаўку тэхналагічнага абсталявання і кантракта будаўнічага падраду.

Міжнародная інжынірынгавая кампанія Citic Construction Co., Ltd створана ў лістападзе 2002 года і з'яўляецца даччынай кампаніяй буйнейшай дзяржаўнай фінансавай карпарацыі Кітая CITIC Group. Асноўныя напрамкі яе дзейнасці - будаўніцтва пад ключ аб'ектаў нерухомай маёмасці, у тым ліку прамысловых, інфраструктурных, спартыўных, экспартна-імпартныя пастаўкі механічнага і электроннага абсталявання. Кампанія рэалізуе праекты ў краінах СНД, Паўднёва-Усходняй Азіі, Паўднёвай Амерыкі, Блізкага Усходу і Афрыкі. У 2007 годзе яна адной з першых кітайскіх інжынірынгавых кампаній пачала дзейнасць на тэрыторыі Беларусі.

З удзелам Citic Construction у якасці генпадрадчыка рэалізаваны праекты па будаўніцтве пад ключ цэментных заводаў ААТ "Беларускі цэментны завод", ААТ "Крычаўцэментнашыфер", ААТ "Краснасельскбудматэрыялы", па арганізацыі вытворчасці зборкі легкавых аўтамабіляў ("БЕЛДЖЫ") на 2012-2030 гады, па мадэрнізацыі Аршанскага льнокамбіната.

У 2016-2018 гадах кампанія ўвайшла ў склад акцыянераў СЗАТ "БЕЛДЖЫ" і ЗАТ "БНБК" (Беларуская нацыянальная біятэхналагічная карпарацыя), стаўшы такім чынам не толькі генпадрадчыкам, але і суінвестарам і акцыянерам па гэтых праектах, прымаючы ўдзел у кіраванні імі.

Цяпер кампанія рэалізуе ў Беларусі тры інвестпраекты: па будаўніцтве абагачальнага калійнага камбіната для ЗТАА "Славкалій", будаўніцтве шматфункцыянальнага гасцінічна-дзелавога комплексу ў Мінску ў раёне праспекта Пераможцаў і будаўніцтве высокатэхналагічнай аграпрамысловай вытворчасці поўнага цыкла для БНБК.

версія для друку

зрабіць стартавай

дабавіць у выбранае