Бізнес-навіны
Лукашэнка прыняў рашэнне аб аказанні гуманітарнай дапамогі Таджыкістану ў выглядзе прадукцыі МАЗ
14 верасня, Душанбэ /Таццяна Паляжай - БЕЛТА/. Беларусь акажа Таджыкістану гуманітарную дапамогу ў выглядзе пастаўкі самазвалаў МАЗ. Такое рашэнне прыняў Прэзідэнт Беларусі Аляксандр Лукашэнка, паведаміла сёння журналістам Надзвычайны і Паўнамоцны Пасол Беларусі ў Таджыкістане Вольга Гаўрук, перадае карэспандэнт БЕЛТА.
Дыпламат выказала ўпэўненасць, што калі таджыкскія партнёры лепш азнаёмяцца з тэхнікай МАЗ, то супрацоўніцтва ў гэтым напрамку рэзка ўзрасце.
Гаворачы аб гуманітарным супрацоўніцтве, Вольга Гаўрук звярнула ўвагу і на актыўнае развіццё ўзаемадзеяння ў сферы адукацыі. Штогод павялічваецца колькасць студэнтаў на сумесным факультэце, створаным на базе Таджыкскага нацыянальнага ўніверсітэта і Беларускага нацыянальнага тэхнічнага ўніверсітэта. Плануецца стварэнне сумеснага факультэта IТ-тэхналогій на базе Белдзяржуніверсітэта і Таджыкскага нацыянальнага ўніверсітэта. Расце з кожным годам колькасць студэнтаў з Таджыкістана, якія паступаюць у беларускія ВНУ як па квоце, так і на платныя формы навучання. Цяпер у Беларусі вучацца звыш 300 таджыкскіх грамадзян. "Калі ўспомніць, што пачыналі мы з 5-8 чалавек, то гэта, вядома, нядрэнны вынік. І інтарэс да адукацыі ў Беларусі павялічваецца, таму што людзі, якія вучацца ў Беларусі, расказваюць сваім сябрам і знаёмым, якую цудоўную адукацыю яны атрымліваюць у Беларусі, якія ўмовы для іх створаны, наколькі наша краіна працвітаючая, спакойная, людзі маюць магчымасць не толькі добра вучыцца, але і добра жыць", - адзначыла дыпламат.
версія для друку
зрабіць стартавай
дабавіць у выбранае