Бізнес-навіны

Лукашэнка патрабуе развіваць і паглыбляць вытворчасць прадукцыі з драўніны

6 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка патрабуе развіваць і паглыбляць вытворчасць прадукцыі з драўніны. Аб гэтым кіраўнік дзяржавы заявіў сёння, заслухоўваючы даклад па развіцці дрэваапрацоўчай і цэлюлозна-папяровай прамысловасці, перадае карэспандэнт БЕЛТА.

"Я вельмі шмат у працэсе выбараў звяртаў на гэта ўвагу, калі нашы "змагары" і "свядомыя" крычалі: "Даёш рэформы!" Вось рэформы - трэба развіваць і, галоўнае, паглыбляць вытворчасць, заснаваную на лясных рэсурсах", - перакананы Аляксандр Лукашэнка.

Ён адзначыў, што ў Беларусі ўжо навучыліся рабіць своеасаблівы "паўфабрыкат": паперу і цэлюлозу. А цяпер трэба ісці далей. "Давайце зробім той жа кардон і не будзем завозіць кардон з Польшчы, Германіі, аддаючы туды цэлюлозу або яшчэ нешта, а адтуль везці гатовы кардон. І гэта трэба рабіць неадкладна. Трэба паставіць машыну, вырабляць кардон і рабіць упакоўку", - падкрэсліў Прэзідэнт.

Паводле слоў кіраўніка дзяржавы, асноўныя работы ў гэтым напрамку павінны быць праведзены ў наступным годзе. "Чаго б нам гэта ні каштавала", - заявіў ён.

Паводле інфармацыі канцэрна "Беллеспаперапрам", роля ляснога сектара ў эканоміцы Беларусі значна ўзрасла ў выніку мадэрнізацыі базавых дрэваапрацоўчых і цэлюлозна-папяровых арганізацый. Аб'ёмы перапрацоўкі драўніны ў краіне значна павялічаны і ў 2019 годзе перасягнулі 20 млн куб.м.

Мадэрнізацыя плітных заводаў дала магчымасць уключыць у абарот нізкасортную драўніну. Агульны аб'ём яе спажывання ў гэтым годзе складзе 5,2 млн куб.м, а да 2025-га толькі дзякуючы стварэнню перапрацоўчых біяэнергетычных вытворчасцей паліўных пелет будзе ўключана дадаткова 2,8 млн куб.м драўніны ліставых парод.

Увод у эксплуатацыю мадэрнізаваных дрэваапрацоўчых комплексаў значна пашырыў магчымасці вытворцаў мэблі. З айчынных матэрыялаў - драўняных пліт - прадпрыемствы пачалі выпускаць эканамічную і запатрабаваную мэблю. За апошнія пяць гадоў колькасць вытворцаў мэблі вырасла ўдвая, і сёння іх ужо больш за 1,3 тыс.

На прадпрыемствах канцэрна "Беллеспаперапрам" праводзіцца глыбокая перапрацоўка драўніны, з яе атрымліваюць прадукцыю з высокай дабаўленай вартасцю, з якой больш за 70 працэнтаў пастаўляецца на знешнія рынкі. У бягучым годзе, нягледзячы на складаную сітуацыю з-за пандэміі каранавіруса, прадпрыемствам канцэрна ўдалося захаваць стабільны ўзровень вытворчасці і рэалізацыі прадукцыі. Са студзеня па жнівень на экспарт пастаўлена прадукцыі на $377,9 млн.

версія для друку

зрабіць стартавай

дабавіць у выбранае