Бізнес-навіны

Лукашэнка нацэльвае на развіццё ў Беларусі звернутых у будучыню напрамкаў, уключаючы біятэхналогіі

16 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка нацэльвае на развіццё ў Беларусі напрамкаў, звернутых у будучыню, уключаючы біятэхналогіі. Адпаведныя заявы ён зрабіў, заслухоўваючы даклад аб інтэграцыі біялогіі і медыцыны, перадае карэспандэнт БЕЛТА.

Кіраўнік дзяржавы растлумачыў, што такая ўвага да біялогіі звязана не з тым, што яго малодшы сын цікавіцца гэтай сферай ведаў. "Я наогул схіляюся перад хімікамі, матэматыкамі, біёлагамі, фізікамі. Я чысты гуманітарый. Але тым не менш я сутыкнуўся больш глыбока на дзяржаўным узроўні. Без біялогіі нікуды. Не можа быць медыцыны сёння без біялогіі. Вось кавід гэты нас напалохаў, і мы фарсіравана пачалі вырабляць вакцыну. Узялі там тэхналогіі, узялі яшчэ нешта, прывезлі, змяшалі, зрабілі. А сваё? Аснова ёсць. Давялося завод будаваць. І там усюды біялогія, - сказаў Прэзідэнт. - Гэтыя вірусы... Учора кавід, сёння воспа гэта малпаў, яшчэ нешта. І, зноў жа, без навукі аб жыцці (так яна ў вас кваліфікуецца) нікуды. Таму я, сутыкнуўшыся з гэтым, зразумеў, што нам трэба неяк сур'ёзна падысці да медыцыны, аховы здароўя, навукі на аснове біялогіі".

Аляксандр Лукашэнка расказаў, што дамовіўся аб развіцці ўзаемадзеяння ў гэтай сферы і з Прэзідэнтам Расіі: "Лепшыя ў свеце ўзоры ёсць. З Прэзідэнтам Пуціным мы дамовіліся. Ён малайчына: калі ласка, любыя лабараторыі. Самая перадавая ў яго біялагічная лабараторыя, як ён мне сказаў, створана ў "Сірыусе" (адукацыйны цэнтр. - Заўвага БЕЛТА)".

Паводле слоў Прэзідэнта, Уладзімір Пуцін запрасіў скарыстацца існуючым у Расіі вопытам і ў тым ліку сумесна развіваць адпаведны напрамак у Беларусі. "Гэтым трэба скарыстацца. Ну і паглядзець лепшыя ўзоры ў свеце па развіцці медыцыны, ахове здароўя, біялогіі і гэтак далей. Без біятэхналогій нікуды. І вы бачыце, што мы ў Беларусі сёе-тое пачалі ў гэтым напрамку рабіць. І не сёння, і не ўчора, а пазаўчора", - заўважыў беларускі лідар.

Кіраўнік дзяржавы падкрэсліў важнасць развіцця і іншых перадавых напрамкаў. Так, гэтымі днямі на ўзроўні Прэзідэнта вывучалі сітуацыю ў галіне вытворчасці мікраэлектронікі. "Сёння біялагічнае напаўненне, паглядзім там іншыя напрамкі, звязаныя з абаронай і з развіццём эканомікі, якія звернуты ў будучыню. Як, дапусцім, атамная энергетыка, космас, БНБК (Беларуская нацыянальная біятэхналагічная карпарацыя. - Заўвага БЕЛТА) пабудавалі. Вось гэтыя напрамкі будуць заўсёды запатрабаваны. Давайце падумаем, як мы, каб не адстаць, будзем іх развіваць. Каб не страціць сваю школу і не адстаць", - сказаў Прэзідэнт.

версія для друку

зрабіць стартавай

дабавіць у выбранае