Бізнес-навіны

11 ліпеня, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка даручыў актывізаваць гандлёвае супрацоўніцтва з Еўрасаюзам. Аб гэтым кіраўнік дзяржавы заявіў сёння на нарадзе па прыярытэтах знешняй палітыкі Беларусі на сучасным этапе, перадае карэспандэнт БЕЛТА.

"Трэба вызначыць не толькі групы, але тавары, якія мы будзем заўтра прадаваць у Еўрасаюз. Вызначце і давядзіце на будучы год", - сказаў кіраўнік дзяржавы.

Аляксандр Лукашэнка даручыў узяць адпаведнае пытанне на кантроль у МЗС, Адміністрацыі Прэзідэнта і Апараце ўрада, каб яно было рэалізавана. "Толькі так мы зможам прарвацца на гэты рынак, - падкрэсліў беларускі лідар. - Нельга ўпусціць момант. Трэба літаральна ўгрызацца ў еўрапейскі рынак, які з'яўляецца найбольш плацежаздольным і тэхналагічным. І гэта задача для ўсіх".

Аб выніках работы і праблемах на еўрапейскім і еўра-атлантычным вектарах на нарадзе расказаў пасол, пастаянны прадстаўнік Беларусі пры Еўрапейскім саюзе Аляксандр Міхневіч.

Паводле яго слоў, пазітыўныя змяненні ў адносінах і акно магчымасцей, якое адкрываецца, дыктуе новы парадак дня з Еўропай. "Першае і галоўнае - мы лічым неабходным дабіцца аблягчэння доступу на еўрапейскі рынак нашых тавараў і ўстараніць бар'еры, - адзначыў дыпламат. - Я ўдзячны Мінсельгасхарчу за актыўную пазіцыю. Мы разам прабіваем магчымасць пастаўкі нашай жывёлагадоўчай прадукцыі на рынак ЕС".

Аляксандр Міхневіч акцэнтаваў увагу на неабходнасці забеспячэння тэхнічнай магчымасці для продажаў шэрага беларускіх тавараў у Еўрасаюзе. "Для гэтага трэба рэальна забяспечыць збліжэнне стандартаў, рэгламентаў, патрабаванняў, маркіроўкі, упакоўкі, бяспекі паміж ЕАЭС і ЕС. Гэтага пакуль няма, нягледзячы на пазіцыю самой Еўразійскай эканамічнай камісіі", - сказаў ён.

Ёсць таксама вялікія нявыкарыстаныя магчымасці для паставак прадукцыі расліннага паходжання, асабліва ў замарожаным выглядзе. Гэты экспарт патэнцыяльна можна павялічыць у разы.

"Мы хочам да канца года завяршыць работу па сістэматызацыі нетарыфных абмежаванняў у ЕС. Дзе можна, гэтыя абмежаванні будзем знімаць. Дзе немагчыма, вызначым алгарытмы руху наперад, навучым прадпрыемствы", - падкрэсліў пасол.

Яшчэ адзін перспектыўны напрамак - развіццё інвестыцыйнага супрацоўніцтва. "Еўрапейскі інвестыцыйны банк гатовы аператыўна пачаць рэалізацыю праектаў у Беларусі пасля заключэння пагаднення на суму не менш як 200 млн еўра ў год. Лічу, што першачарговая задача Мінэканомікі разам з намі і галіновымі міністэрствамі і ведамствамі - ужо да восені падрыхтаваць адпаведны пералік праектаў і пачаць іх абмеркаванне з банкам", - расказаў Аляксандр Міхневіч.

"Наступная тэма - гэта ініцыятыва "Адзін пояс і адзін шлях". Для еўрапейцаў стала рэальным адкрыццём стварэнне ў Беларусі "Вялікага каменя". Гэта адразу на парадак узняло транзітную значнасць нашай краіны і яе важнасць на Шаўковым шляху", - дадаў дыпламат.