Бізнес-навіны

30 снежня, Мінск /Аліна Грышкевіч - БЕЛТА/. Прэзідэнт Беларусі Аляксандр Лукашэнка адзначае важнасць таго, што да рэспубліканскай дабрачыннай акцыі "Нашы дзеці" актыўна далучыліся не толькі чыноўнікі, але і шмат бізнесменаў. Аб гэтым Прэзідэнт заявіў, адказваючы сёння на пытанні журналістаў, перадае карэспандэнт БЕЛТА.

Кіраўнік дзяржавы заўважыў, што СМІ паказваюць, што з падарункамі ў дзіцячыя дамы, школы, інтэрнаты напярэдадні Каляд і Новага года прыязджаюць дзяржслужачыя, чыноўнікі. Ён звярнуў увагу журналістаў, што ў дабрачынную акцыю актыўна ўключыліся бізнесмены. "У нас столькі бізнесменаў, проста багатых людзей, якія дзеляцца сваім дабром, грашамі. Ідуць з падарункамі ў дзіцячыя дамы, школы, інтэрнаты, да старых, хворых", - сказаў ён.

"Бачу, што ўся краіна адгукнулася, я вельмі рады, малайцы! Вось так і павінна быць у сапраўднай дзяржаве. Тады ніякія крызісы не страшныя", - упэўнены Аляксандр Лукашэнка.

Журналісты закранулі таксама тэму таго, што Аляксандр Лукашэнка ў вольны час займаецца вырошчваннем агародніны на тэрыторыі сваёй рэзідэнцыі.

Кіраўнік дзяржавы адзначыў, што сапраўды гэта яго хобі. Многае з гэтых агародніны і садавіны перадаецца потым у дзіцячыя дамы, інтэрнаты для састарэлых.