Бізнес-навіны

Лукашэнка абяцаў "Кронаспану" падтрымку ў будаўніцтве мэблевай фабрыкі

24 чэрвеня, Свіслацкі раён /Кар. БЕЛТА/. Прэзідэнт Беларусі Аляксандр Лукашэнка абяцаў "Кронаспану" падтрымку ў будаўніцтве мэблевай фабрыкі. Аб гэтым кіраўнік дзяржавы заявіў сёння ў час наведвання транспартна-лагістычнага цэнтра "Сільва Ладжыстык БіУай" у Свіслацкім раёне, перадае карэспандэнт БЕЛТА.

Лагістычны цэнтр належыць кампаніі "Кронаспан ОСБ", якая займаецца ў Беларусі дрэваапрацоўкай. Сваю прадукцыю яна пастаўляе як на ўнутраны рынак, так і на знешні. Але, лічыць кіраўнік дзяржавы, адпрацаваную драўніну, па сутнасці, паўфабрыкат, кампанія магла б выкарыстоўваць і сама, напрыклад, вырабляць мэблю. Але для гэтага ёй трэба пабудаваць фабрыку. "Чым большай будзе дабаўленая вартасць у Беларусі, тым больш мы будзем падтрымліваць вас", - запэўніў Аляксандр Лукашэнка.

"Увогуле, выбірай месца, скажы губернатару, хочаш - памочніку (памочніку Прэзідэнта - інспектару па Гродзенскай вобласці Юрыю Караеву. - Заўвага БЕЛТА), яны даложаць, у якім месцы ты будзеш рабіць фабрыку. Бяру пад кантроль, і дапаможам табе ва ўсім. Абсталяванне сам закупіш, а сыравіны ў цябе хапае", - сказаў Аляксандр Лукашэнка.

Таксама Прэзідэнт абяцаў падтрымаць і іншыя інвестыцыйныя праекты прадпрыемства.

У 2010 годзе кампанія "Кронаспан" падпісала інвестыцыйнае пагадненне з урадам Беларусі, у адпаведнасці з якім з 2012-га па 2016 год пабудаваны пяць буйных вытворчых ліній у Магілёве і Смаргоні па вырабе ДСП, ламініраваных ДСП, МДФ, імпрэгніраванай паперы, падлогавых пакрыццяў.

З 2010-га па 2016 год агульны аб'ём замежных інвестыцый кампаніі "Кронаспан" склаў больш за 919 млн еўра, створана 1017 рабочых месцаў з сярэдняй зарплатай больш за $650 у эквіваленце.

версія для друку

зрабіць стартавай

дабавіць у выбранае