Бізнес-навіны

Крутой: у Беларусі і Татарстана высокі патэнцыял супрацоўніцтва ў IT-сферы

Дзмітрый Крутой і Раман Шайхутдзінаў. Фота Пасольства Рэспублікі Беларусь у Расійскай Федэрацыі

9 лістапада, Масква /Эдуард Півавар - БЕЛТА/. У Беларусі і Татарстана высокі патэнцыял супрацоўніцтва ў IT-сферы, заявіў пасол Беларусі ў Расіі Дзмітрый Крутой у час наведвання Інаполіса - горада-спадарожніка Казані, які ўваходзіць у яе агламерацыю, паведамілі БЕЛТА ў прэс-службе беларускага дыппрадстаўніцтва.

"Бачым перспектывы ўкаранення высокатэхналагічных кампетэнцый рэзідэнтаў Інаполіса ў работу нашых прамысловых гігантаў МАЗ, МТЗ, БЕЛАЗ. Таксама чакаем высокага эфекту ад супрацоўніцтва Інаполіса з беларускім Паркам высокіх тэхналогій і акадэмічнымі структурамі ў найбольш запатрабаваных сегментах ІТ-галіны: беспілотных тэхналогіях, камп'ютарным зроку, стварэнні лічбавых двайнікоў", - сказаў пасол.

У Інаполісе размешчаны аднайменныя ўніверсітэт і свабодная эканамічная зона. Ён з'яўляецца адным з трох навукагарадоў у РФ (разам з падмаскоўным цэнтрам Сколкава і новасібірскім Кальцова), створаных для развіцця інфармацыйных тэхналогій і інавацыйных высокіх тэхналогій. У суправаджэнні намесніка прэм'ер-міністра Татарстана Рамана Шайхутдзінава пасол пабываў на некалькіх інфраструктурных аб'ектах ІТ-горада і асобай эканамічнай зоны "Інаполіс". Сярод іх - цэнтр тэхналогій кампанентаў робататэхнікі і мехатронікі Універсітэта Інаполіс, у склад якога ўваходзяць цэнтр робататэхнікі, цэнтр беспілотных тэхналогій, лабараторыя штучнага інтэлекту, дызайн-цэнтр электронікі і мікраэлектронікі і сектар суправаджэння і развіцця.

Таксама кіраўнік дыпмісіі наведаў тэхнапарк імя А.С. Папова і новы тэхнапарк у сферы высокіх тэхналогій "ІнаПарк" плошчай больш за 12 тыс. кв.м, які пачаў работу ў снежні мінулага года. Тут актыўна развіваюцца праекты ў сферы робататэхнікі, электронікі, беспілотных лятальных апаратаў.

версія для друку

зрабіць стартавай

дабавіць у выбранае