Бізнес-навіны

Комплекс запаволенага каксавання на "Нафтане" плануюць запусціць да канца 2021 года

22 студзеня, Наваполацк /Кар. БЕЛТА/. Комплекс запаволенага каксавання ў ААТ "Нафтан" плануюць запусціць да канца гэтага года, паведаміў журналістам генеральны дырэктар прадпрыемства Андрэй Сойка, перадае карэспандэнт БЕЛТА.

Комплекс уключае 19 установак, 12 з іх пабудаваны і па некаторых падпісаны акты ўводу ў эксплуатацыю. "Нам засталося дабудаваць сем аб'ектаў. Сярод іх асноўнай з'яўляецца сама ўстаноўка запаволенага каксавання. Плануем закончыць будаўніча-мантажныя работы ў маі, а ўвесці ўвесь комплекс у эксплуатацыю да канца 2021 года", - сказаў Андрэй Сойка.

Рэалізацыя праекта знаходзіцца на кантролі вышэйшага кіраўніцтва краіны. Цяпер на будаўніцтве працуюць амаль 800 чалавек. У інвестыцыйны праект ужо ўкладзена больш за $1 млрд. У гэтым годзе на комплексе плануецца атрымаць асноўную прадукцыю - светлыя нафтапрадукты.

Гендырэктар дадаў, што пасля запуску комплексу запаволенага каксавання на "Нафтане" ў бліжэйшыя гады ўпор будзе зроблены на развіцці завода "Палімір".

Сёння з ходам мадэрнізацыі "Нафтана" азнаёміцца прэм'ер-міністр Раман Галоўчанка. У прыватнасці, ён папрасіў далажыць аб тым, ці вырашыліся праблемы з будаўнічымі кадрамі, ці хапае матэрыялаў, і падрабязна расказаць аб графіку рэалізацыі праекта. Таксама сярод важных пытанняў - тэрміны пачатку выпуску прадукцыі на комплексе і стадыі выхаду на праектную магутнасць.

версія для друку

зрабіць стартавай

дабавіць у выбранае